黃家強前晚喺九展舉行尾場「It's Alright演唱會」，太太繼續撐場，嘉賓黃耀明同家強合唱《抗戰二十年》，喺台上暗撐六四人士。
之前俾黃貫中（Paul）數臭嘅家強喺台上眼濕濕話：「家駒離開咗20年，係咪做細佬乜都唔做呢？係咪連我同阿哥講句『我好掛住佢』都唔得？」現場粉絲拍手大叫：「加油！」家強話：「我唔理人點講，我要懷念我阿哥，鍾意幾時懷念就幾時懷念，一齊講一句『家駒懷念你』！」全場附和。尾聲時現場播放演藝界朋友嘅照片，第一張相係葉世榮，家強則唱《好好》送畀遠方嘅家駒。
家強（右）同黃耀明合唱《抗戰二十年》獻給「逝去的靈魂」，暗撐六四人士。家強前晚獲太太繼續撐場。
願正面接受佢
家強喺慶功宴逐一澄清所有爭拗，強調Beyond唔係家族生意，只想保住Beyond名聲，唔想支持佢哋嘅人心痛。對Paul反常撐佢開騷，問擔唔擔心Paul情緒有問題？佢好認真咁話：「我有擔心過，但我哋係外人，只可以話當年係好朋友，大家現在各有自己家庭，情緒留畀家人照顧，外人照顧唔到。」家強話仲當Paul係朋友：「我寧願正面接受佢所有一切，咁大家係咪開心啲呢？唔好搵舊事，過去就過去。」
from:
http://hk.apple.nextmedia.com/entertainment/art/20130607/18287198
