吳彥祖與老婆Lisa S.的愛情結晶品Raven終於出世！昨日兩公婆在微博分別以中、英文版本公佈喜訊，吳彥祖昨日到尖沙嘴出席電影活動時難掩初為人父的興奮，不過為保持神秘，他只上載女兒的手仔照片上微博。疼錫愛女疼錫到出晒面的他，還叫戲中兩位男主角古天樂和劉青雲保護女兒。
電影《竊聽風雲3》台前幕後昨日舉行開鏡活動，監製爾冬陞、導演莊文強與麥兆輝、吳彥祖、古天樂、劉青雲、黃奕和葉璇等現身。昨日在網上公佈初為人父喜訊的吳彥祖自然成焦點，提到愛女Raven，他笑不攏嘴說：「其實係星期四（上月30日）開刀，我都有入產房，幾surprise，因為過程好快，大約都係20分鐘。」
Lisa S.上周四為夫婿吳彥祖剖腹誕下女兒Raven，展開人生新里程。初為人父的吳彥祖昨日講起囡囡，即笑不攏嘴。
入產房被嚇親
吳彥祖笑言剖腹過程幾暴力，故未有拍片：「其實我有啲驚，但唔可以畀Lisa知，我又畀唔切反應，生完出嚟就要我抱住做body check、剪臍帶，大約8磅重，都幾大嚿。佢嘴嘟嘟、鼻高高、多頭髮、單眼皮。」兩人為女兒改名Raven，他說：「覺得好靚，中文名會等爸爸改，佢要9月先返。」他直言知道是女兒後已好擔心，隨即要求古仔和青雲幫手保護女兒：「如果個女拍拖，入屋見到我哋三個都要嚇吓佢。」他透露女兒要曬燈，古仔搞笑說：「我屋企有，你湊佢嚟照啦。」
青雲就表示要送床仔讓Raven與Uncle Louis（古仔）齊齊瞓住照燈。另外談到新戲，青雲為角色留鬚，問其老婆郭藹明有否投訴鬚好拮？青雲即語帶雙關說：「等我今晚返去問吓老婆拮唔拮先？」另外，Lisa好友Ana R.表示見過Raven，早前為Lisa舉行baby shower派對，又謂希望做Raven的契媽。
剛出世的Raven只有手仔曝光，保持神秘感。古仔（右）和青雲被吳彥祖委託保護其女兒。
from:
http://hk.apple.nextmedia.com/entertainment/art/20130604/18282589
