王維基嘅香港電視新聞多多，日前俾甘草演員丁主惠投訴拍新劇《我阿媽係黑玫瑰》動作戲時冇替身而受傷，個劇繼續拍到下月初。女主角惠英紅（小紅）前日同盧宛茵、吳浣儀等喺荃灣如心廣場拍外景，可能因為日光日白，小紅冇一身黑玫瑰造型出現，回復劇中嘅阿媽身份。同劇嘅龔慈恩同湯怡喺另一邊拍外景，湯怡熱到勁抹汗。
呢幾日太陽咁猛，惠英紅曬到眼都擘唔大咁滯。劇組舉傘，以防惠英紅曬到變「黑」玫瑰。
落雨跣住跑
講到做黑玫瑰要打，咪好辛苦囉？小紅噚日喺電話度話：「呢個劇以喜劇效果為主，打戲難度唔高，對我嚟講唔算乜嘢動作戲。」對於日前丁主惠投訴有場跌倒戲冇替身，小紅就話：「好多戲我都係自己打番，只係有場跳彈床用咗替身，或者我之前去咗大陸開工，就用替身代我拍，不過有啲動作戲同反應都係自己做番，有場戲我要喺大斜路着住四吋高踭鞋落住雨咁跣住跑落去，都係自己拍，始終四肢、形態上都睇到係演員。」
湯怡（右）熱到係咁抹汗，龔慈恩亦「揦口揦面」。丁主惠拍劇受傷，日前戴住頸箍受訪。資料圖片
小紅強調劇組做足安全措施，一啲問題都冇，仲話丁主惠受傷嗰場戲有黑玫瑰個黑影飛過，所以用咗替身代佢跳彈床，而嗰場戲就係要拍丁主惠跌倒嘅反應，相信唔係動作演員至會發生問題。
至於丁主惠噚日喺電話度話報道出街後，公司依然冇人搵過佢。而香港電視發言人鄭靜雯就話管理層好重視丁主惠受傷事件，行政總裁杜惠冰同導演都即時搵丁主惠了解，公司調查緊，本周會有報告。
from:
http://hk.apple.nextmedia.com/entertainment/art/20130604/18282556
