王祖藍同國際華裔小姐冠軍出身嘅李亞男，呢對長短腳之戀嘅情侶，到今時今日可謂打風都打唔甩。前日下晝3點幾祖藍趁唔使開工，同女朋友出動拍拖，剃咗光頭嘅祖藍戴住cap帽踢住拖鞋就出巡，認真自由自在，而本身高過男朋友嘅亞男，為咗減低兩人嘅差距，仲刻意着咗對平底鞋行街，認真體貼。
王祖藍（左）同李亞男趁住放假去睇戲，仲買定蒸飯燉湯入場。
買嘢癮起
佢哋先將架車泊喺中環ifc，然後坐船去離島愉景灣漫步，感受大自然氣息。之後大概5點鐘去返ifc，去咗一間專賣燉湯同蒸飯嘅外賣店買飯同湯，呢間外賣店強調冇味精同雞粉，經過一輪研究，祖藍同亞男買咗足足三大袋。買完燉湯、蒸飯之後佢哋返落停車場，將其中兩袋放落車之後，祖藍仲攞定外套，可能怕戲院冷氣會凍親女友，真係細心。跟住祖藍攞住剩低嗰袋蒸飯上返商場，兩個人行咗去ifc嘅戲院，買咗一場5點40分嘅戲票，捧導演陳可辛場，睇佢套新作《中國合伙人》。
祖藍同亞男買蒸飯，身邊嘅太太把握機會用手機影相。祖藍同亞男感情穩定，就算喺公開地方都一樣拖手甜蜜行街街。
未夠鐘祖藍已經入場，入到戲院，買嘢癮起，再喺戲院嘅咖啡店買咗包咖啡粉同兩支飲品至肯入場。不過令人奇怪佢帶住咁大袋飯入戲院唔知做乜呢？唔會係一邊睇戲一邊開飯咁慳家啩。
祖藍父愛突然爆發，撩外籍人士嘅BB玩。祖藍同亞男返車攞衫準備入場睇戲。
from:
http://hk.apple.nextmedia.com/entertainment/art/20130604/18282605
