莊思敏、寸嘴芭比夏尉喻、吳若希同魯芬等唔同類型嘅靚女，前晚齊集喺佐敦出席新戲《溝女不離3兄弟》嘅煞科宴，其中莊思敏同夏尉喻都谷胸上陣鬥搶鏡，而莊思敏同傳緋聞嘅葉念琛表現大方仲一齊合照。
除咗拋胸，莊思敏仲着住6吋高踭鞋，佢話喺戲中成日要着兼且仲要行得好快，好彩冇受傷，只不過返到屋企就腳痛。莊思敏又話同台前幕後合作得好開心，拍完分開好唔捨得，係咪最唔捨得導演呢？佢笑笑口話：「唔係，好朋友啫，我哋緋聞傳完，𠵱家期待下一個。」
莊思敏、吳若希同連詩雅等扮到靚靚出席煞科宴。
吳若希pat pat要加墊
喺戲中扮rock友嘅連詩雅就好密實，佢透露導演臨時加咗場佢同沈震軒嘅濕吻戲：「導演話加冇得拒絕，冇心理準備下拍好尷尬，但冇時間去諗咁多，不過大家冇錫出火花。」同場嘅吳若希近日變臉變到似謝安琪，佢話：「冇整過，要整先整雙眼皮同瘦面。」會唔會想整胸？吳若希笑話：「我都唔少嘢，因為本身我腰細令胸似大，我都有34-24-35。」吳若希又透露拍戲嗰陣pat pat要加墊，令體形好睇啲。
寸嘴芭比夏尉喻着上黑色貼身背心裙，搞到上圍逼爆。雖然傳出緋聞，但葉念琛同莊思敏同場冇乜避忌。
from:
http://hk.apple.nextmedia.com/entertainment/art/20130604/18282568
