周秀娜（Chrissie）同男友陳偉成（Avis）分手後，上星期三係娜姐甩拖後過嘅首個生日，不過28歲嘅佢話往年生日都係開工，所以已經慣咗一個人，況且今年有班好同事同佢慶祝，所以都冇唔開心。
娜姐前日去超巿掃貨準備下廚賀同月生日嘅男助手，佢對芝士似乎情有獨鍾。
至叻煲湯
前日下晝4點，娜姐同男助手喺中環ifc嘅city'super買餸，戴住墨鏡、着連身裙孭住個Chanel手袋嘅娜姐對芝士、鵝肝同乳酪食品情有獨鍾，佢企喺凍櫃前面研究咗好耐，期間不停試食同問意見，最後喺短短半個鐘娜姐掃咗成袋芝士、火腿同法國長包走人，由助手拎住離開。
男助手介紹娜姐食煙三文魚（左圖），不過最後娜姐都係買咗芝士同火腿等食品。
問娜姐係咪開大食會？佢話公司有同事生日，所以自己出錢搞party，佢仲親自下廚整嘢畀同事食，佢話：「我上次煲湯畀同事飲，佢哋讚不絕口仲連湯渣都食埋。」跟手佢哋去咗花檔揀鮮花，不過睇唔啱，於是就走咗去買爆谷。
呢個時候男助手煞有介事走過嚟補充話：「係我同娜姐同一個月生日，所以一齊搞生日party。」跟住娜姐攞住兩大包焦糖味爆谷去停車場攞車走人。
埋單後，男助手拎住法國長包同戰利品走人，娜姐就緊隨其後。娜姐係試食專家，臨上車前試埋爆谷先走。
from:
http://hk.apple.nextmedia.com/entertainment/art/20130530/18276458
