亞視主要投資人王征，自從喺政府總部拉隊跳馬舞「技驚四座」，令到更多香港人認識佢。近日王征又俾通訊事務管理局裁定佢違規操控亞視，要罰亞視100萬元，加埋之前亞視創出零收視嘅電視奇蹟，王征都可算係內憂外患。但係佢似乎依然大把在手，前日下晝4點，仲好好心情帶埋佢堂細佬、亞視執行董事盛品儒去中環ifc行街濕平。
亞視執行董事盛品儒前日陪堂大佬、亞視掌舵人王征去中環買女裝袋。王征（右）同盛品儒兩個男人去買幾個女裝銀包仔，前後花咗15分鐘。
怕醜避鏡頭
王征同盛品儒兩個男人好似係有晒目標而嚟，一上到樓就入咗Kwanpen皮具店，裏面主要賣女裝皮具，而且顏色鮮艷，似乎唔係好啱兩位男行政人員。果然佢哋主要睇一啲女性嘅手提包，買嘢嘅係王征，身旁嘅盛品儒不時畀意見，佢哋嘅出現，吸引咗記者喺門口影相，搞到王征好怕醜，要背住門口避鏡頭。前後唔夠15分鐘，王征已經買咗三小盒戰利品，相信係小銀包之類嘅用品，然後就畀錢走人，兩個男人急急腳上番泊喺樓下嘅平治走人。
Kwanpen係新加坡品牌，用創辦人嘅名命名，已經有70年歷史，以製作鱷魚皮革用品出名，價格由幾千蚊嘅男裝皮帶，到幾萬蚊嘅女性手袋都有。
王征（右）親自攞住戰利品，同盛品儒急急腳走人。舊年王征（中）喺政總帶領員工跳騎呢馬舞，可謂技驚四座。
from:
http://hk.apple.nextmedia.com/entertainment/art/20130524/18269577
