唔知係唔係近排天氣反常，所以好多人都病咗，前日有幾個藝人同名人都先後去咗跑馬地養和醫院探病或者睇醫生。
前晚接近7點鐘左右張家輝司機攞咗籃生果離開養和上番架私家車，一分鐘之後隻左手紮到實，包到好似隻糭咁款嘅張家輝，就由上山詩鈉陪同下離開，原來佢左手隻手指尾要做手術，佢臨上車仲猛話：「冇事。」
事實證明張家輝冇講大話，因為夜晚11點佢衫都冇換，仲有精神同幾個朋友去咗銅鑼灣一間樓上酒吧消遣，一直飲到噚日凌晨兩點幾，幾個人都帶住醉意落樓離開。張家輝同朋友道別之後，就徒步十分鐘行返黃泥涌道逸廬嘅寓所，呢度係家輝嘅新居，佢花咗3,000萬喺度買咗個單位，粵劇名伶白雪仙都喺度住。
做完尾指手術嘅張家輝，由上山詩鈉陪住離開醫院。家輝同兩個男性朋友飲完酒離開時仲雞啄唔斷。
臨走時，家輝仲擁抱個男友人咀面，睇嚟好唔捨得咁。
陳友緊張攞報告
另外，溫拿樂隊嘅陳友前日都現身養和，離開嘅時候仲攞住份類似報告嘅紙一邊好緊張咁睇到好入神，一邊等的士離開。大概接近7點鐘，賭王何鴻燊長房女兒何超英由私家看護照顧之下坐輪椅離開，司機一早開定七人車門扶佢上車，超英嘅動作好慢。」
坐住輪椅嘅賭王長房女何超英由私人護士推出醫院。陳友等的士嘅時候不停喺度研究份報告。
from:
http://hk.apple.nextmedia.com/entertainment/art/20130515/18260067
