馬國明同楊怡近日都忙於為無綫新劇《On Call36小時II》拍外景，噚日佢哋就喺將軍澳拍一場講馬明遇車禍嘅戲，楊怡即場為佢急救，之後受傷嘅馬明俾人抬上擔架床，楊怡激動到眼紅紅而且衝上前表現緊張又傷心。
劇情講馬國明受傷，楊怡見到即刻激動到喊。昨日拍攝講馬國明因車禍受傷，被抬上擔架床。
唔會離開無綫
馬明同楊怡表示近日由早踩到晚，所以已預早慶祝母親節。楊怡緋聞男友羅仲謙有冇喺噚日嘅母親節行外母政策？楊怡即話：「好忙，乜政策都冇得行。」
另外有唔少無綫演員都積極想爭取返內地拍劇搵人仔，馬明同楊怡異口同聲表示想拍內地劇，只可惜以往都係檔期遷就唔到，馬明話：「我一年有一套內地劇都夠，叫我留一、兩年我都唔慣。」楊怡透露公司已經開始同佢傾續約，佢賣口乖話：「TVB係我娘家，我唔會離開TVB，但都會同公司反映吓想拍內地劇。」馬明同楊怡都笑笑口話要搵喺內地拍劇賺大錢嘅鄭嘉穎請食飯。
from:
http://hk.apple.nextmedia.com/entertainment/art/20130513/18257811
