Eason冧暈露雲娜俾全城「通緝」、狂追演唱會飛嘅陳奕迅（Eason），周一（22日）終於現身，去咗露雲娜同賈思樂嘅演唱會記招撐場！吹神即係吹神，一上台先肉緊錫錫50歲嘅娜姐姐，再大讚前輩：「佢係一個型女，思想前衞，同我哋啲後生仔女一樣㗎！」嘩，𠱁到娜姐姐笑到見牙唔見眼，完全忘記咗企喺側邊嘅多年老友兼拍檔賈思樂。
話時話，Eason全程嘅表現仲high過兩位活動主角！又係嘅，佢7、8月喺紅館開25場演唱會，啲飛極速賣晒，連阿女康堤啲老師都要追飛！抵佢鬆毛鬆翼。
嘩，後生可畏呀！（設計對白）Eason一上台，第一件事就去錫露雲娜！睇到側邊嘅賈思樂眼都凸。碎料嚟啫！（設計對白）司儀盧敏儀話好難請到陳奕迅，但Eason即刻話：「我好易請，但最近避緊鋒頭（飛債）！」笑死露雲娜。
原本有開香檳儀式，但老闆孫敬安話因四川大地震，所以留番慶功先開，有心！
