荷李活猛片《鐵甲奇俠3》（Iron Man3）熱潮席捲香港，截至前日本地票房高達2,521萬，前晚9時譚詠麟（阿倫）和紅顏知己朱詠婷（Wendy）拍拖到數碼港睇戲，兩人不介意搵老友彭健新做電燈膽，不過他們就前後腳入場，低調的Wendy獨自進場後，阿倫和健仔兩秒後便衝入場。
前晚Wendy與阿倫睇戲後快閃走人，還刻意用手遮面。阿倫（左）與電燈膽健仔一齊步出戲院。
阿倫和Wendy貪數碼港地點偏僻，他們數年前亦被影到在該戲院睇泰片《冬蔭功》和《變形金剛》。前晚二人散場後，同樣由Wendy首先步出，她發現記者即急步快閃，邊行邊用手遮面避鏡頭，阿倫和健仔跟在後面慢步走，還扮八卦望泊街被抄牌的車輛，刻意跟Wendy拉遠距離避合照，最後Wendy登上阿倫的私家車後座，甘願做阿倫背後的女人，健仔就坐阿倫隔籬，由阿倫做柴可夫揸車離去。
阿倫紅顏知己Wendy甘做他背後的女人，前晚由離開戲院至上車都同阿倫保持距離。阿倫待Wendy登上後座，才施施然拉開司機位車門上車。
健仔：阿倫突然話睇
昨日記者致電健仔，他讚《鐵甲3》好睇：「阿倫突然間話睇，即上網訂飛，所以啲位唔靚，坐前面幾行仲要側邊位。」問他為何做電燈膽？他說：「唔係，成日都係咁，溫拿係大家庭。」知否阿倫兒子曉風考牛津？健仔說：「嘩，真係唔知，佢好低調，唔想防礙囝囝學業，隻字不提，怕影響學校。」另外，昨日港台節目播出阿倫訪問，他覺得現今歌手欠缺舞台演出經驗，還爆料說：「有次喺錄音室聽到某一線女歌手，冇一段完整啱音，佢話唔嚟補，靠人哋用電腦搞，後來我聽番真係好似好得，冇事。」
from:
http://hk.apple.nextmedia.com/entertainment/art/20130429/18243384
