譚詠麟（阿倫）啱啱喺英國出席完囝囝譚曉風喺牛津大學工程科學嘅碩士畢業禮，21歲嘅曉風高大靚仔讀書又叻，曾經喺英國GCSE（英國中學會考）考獲12A*佳績，以拔尖身份考入世界頂級學府牛津大學。
一向將家人低調嘅阿倫一反常態，噚日喺社交網分享呢份喜悅，阿倫攬住曉風豎起手指公個樣勁開心，留言：「太開心了！原來一個不留神Harry Pottam已經碩士畢業了！」阿倫仲着咗曉風件畢業袍同戴埋四方帽影相，而有份出席嘅狄波拉就搞笑扮跪地送花畀阿倫。已回港嘅阿倫仲拍咗條片放上facebook，多謝大家關心。
拉姑都玩埋一份，扮跪地送花畀阿倫。微博圖片
阿倫一向疼錫21歲兒子曉風。資料圖片
曾志偉（右）同黃韻材噚日齊做善事，志偉更讚阿倫巴閉。
志偉笑巴閉
另外，曾志偉噚日同萬綺雯等喺鑽石山出席志蓮淨苑中秋福餅義賣活動，講到曉風牛津畢業，志偉笑話：「巴閉啦！佢（阿倫）開心到，未見過佢咁甜，平時佢好多嘢好秘密，今次一講到個仔就一輪嘴，又獎學金又牛津，直情係中狀元啦。」志偉又寸阿倫戴四方帽：「冇法啦，佢一生人讀唔到，個仔讀到都戥佢開心，咁巴閉，靚仔又乖，咁有錢個仔讀書又唔使錢，呢個世界真係唔公平。」
問到曉風有冇拍拖？志偉話：「冇講喎，唯一冇遺傳老竇就係惹桃花。」會唔會帶曉風入行？他笑話：「我諗唔會，讀咁多書，帶挈吓細叔伯投資起樓仲好。」
撰文：馮仁昭
from:
http://hk.apple.nextmedia ... 170731/20106545
