三年前，陳靜（DaDa）以𡃁模身份發射34E導彈，她的名字雖然簡單，但宅男依舊憑「胸」記着她是「百果園E神」。去年她參演電影《低俗喜劇》，大家又轉口喚她爆炸糖，DaDa更憑該片一擊即中，勇奪今屆金像獎最佳女配角，食糊彈起，馬上變成歷史，幸運DaDa是賣肉𡃁模當中的成功例子，天時地利人和，造就她的光明前途，並訂出五年晉身影后目標。
近年𡃁模的出現，為影壇提供不少生力軍，元祖楊穎（Angelababy）及女神周秀娜已先後彈出，她們各自搶攻內地巿場吸金，後起的陳靜憑電影《低俗喜劇》中爆炸糖一角，搶先在第32屆香港電影金像獎中冷手執個熱煎堆，撼低前輩級勁敵，捧走最佳女配角獎座。年僅24歲的DaDa入行短短三年，處女作是《潮性辦公室》，緊接拍了《喜愛夜蒲》及《低俗喜劇》，三部電影的經驗便時來運到升呢最佳女配角，她的成績絕對稱得上是賣肉𡃁模的勵志典範。
資歷尚淺的DaDa跳過最佳新演員門檻，首次提名金像獎最佳女配角便食糊，情況就如小學生因成績優異而獲校方安排跳級，DaDa說：「天時地利人和造就咗我攞獎，我覺得自己好幸運，身邊好多貴人。比起一眾前輩，我唔算最好，或者今年撞啱評審想畀機會新人，我就僥倖得獎，我知自己仲有好多學習空間。」獎項雖為DaDa帶來壓力，但同時也令她開竅，一夜成長，她說：「記得初入行，我未清楚自己目標，成日發緊夢咁，呢個獎令我醒咗，好似打咗強心針，我明白未必被所有人肯定，但我一定會下苦功，努力學習同進步，畀啲成績觀眾睇。」
DaDa努力得到認同，令她更有信心做好，希望五年內能獲影后提名。出道短短三年的DaDa，勇奪今屆金像獎最佳女配角。
為「高登先」勤咪書
DaDa更訂出五年問鼎影后的目標，她說：「我希望可以喺五年內，喺電影頒獎禮獲得提名最佳女演員。」為了拉近目標距離，DaDa打算增值自己，她說：「我𠵱家無時無刻都提醒自己勝不驕，華仔（劉德華）今時今日待人都好謙虛，我首先要學佢呢份態度。獎項得嚟不易，有咗佢未必代表永遠擁有，可唔可以留住，就要睇我自己。」DaDa在金像獎台上，多謝電影發行公司Golden Scene，卻因懶音變成「高登先」，重提美麗誤會，她尷尬地說：「嗰日上到台，太突然令我好怯，講嘢都𧄌脷，我其實兩方面都想多謝，除咗Golden Scene，仲有高登嘅絲打。」她不但自愧演技幼嫩有待進步，即使英文都多學習，兩方面都打算找老師指導。
DaDa自爆獲伯樂彭浩翔親授錦囊，她說：「彭導教我要睇多啲書，佢畀咗張清單我，我開始書不離手。佢建議我乜嘢題材嘅書都要睇，我以前淨係睇深雪同張小嫻嘅愛情小說，𠵱家開始睇唔同類型。的而且確，睇書係可以啟發個腦袋多啲思考，即使同一本作品，唔同時間去睇，感受都唔一樣。」她表示近日正閱讀彭浩翔推介的《我們最幸福》，內容圍繞北韓人民生活，她說：「我越睇越有興趣。」
無悔靠賣肉出位
三年前還是賣肉博上位的𡃁模，DaDa絕不後悔倒瀉E奶誘宅男，她說：「可能好多人對𡃁模有唔好印象，但當年出寫真係我嘅踏腳石，否則冇人會認識我，我只係用寫真集令大家關注咗我。」DaDa這次獲獎可謂令𡃁模吐氣揚眉，成績甚至超越Baby及周秀娜，DaDa謙虛的說：「我唔會咁諗，大家行條路唔同，唔可以咁樣比較，佢哋出道先，人哋嘅優點我會學習，我都會做好自己。」升呢DaDa也不會就此封胸，她說：「我覺得性感唔係賣肉去界定，好似周迅同舒淇，佢哋一個眼神同表情就完全表達得到，我會視乎電影角色，劇情需要唔介意性感。」不過她仍堅守三點不露，她說：「我學唔到湯唯，佢始終接受過演藝訓練，佢將裸露戲份變成藝術，我入行答應過家人三點不露，我要守信。」
廣邀舊愛開P
三年前寂寂無聞的DaDa，直認曾與王宗堯及前男子組合Square的趙俊承（Gary）拍拖，近年上位後，她卻強調單身沒人追，並說：「攞獎後嗰幾日，我keep住好sweet嘅心情，我相信自己好似嫁咗畀演藝事業咁。」現年24歲的她曾憧憬27歲出嫁，但成為出爐金像女配角後，她卻不甘早婚：「呢幾年，我想畀自己專注事業先，我唔抗拒拍拖，歡迎大家嚟追我，一切隨緣，遇到啱嘅對象，我又或者會閃婚。」
DaDa表示不介意約埋舊愛王宗堯（左）及Gary一齊慶祝。資料圖片
從前擇偶愛靚仔的DaDa，長大了選婿條件都更改，她說：「對方唔使富二代、唔使靚仔，我只希望佢上進，可以愛屋及烏，錫我家人同朋友。」DaDa跟舊愛王宗堯再見亦是朋友，她說：「佢有恭喜我得獎，我等佢親手下廚畀我食。」她笑言不排除廣邀舊愛為她開慶祝P，high爆的她更風騷爆響口：「包場餐廳唔知夠唔夠坐？」
愛酒嗜甜大無畏
女星怕肥不怕餓，DaDa卻有大無畏精神，面對無形壓力，她會喪食朱古力及喝酒紓緩心情，她日前奪得金像獎最佳女配角時，於後台接受訪問時已難掩興奮，她衝口而出說：「𠵱家最想飲酒！今晚有心理準備飲醉！」結果她於慶功宴上逢人隊，自認酒量不錯的她說：「我6歲時住過上海，外公有教我女仔人家要學識飲酒，否則大個好蝕底。」其千杯不醉的酒量就是自幼練成，她說：「我鍾意飲紅酒同清酒，我雖然會追酒飲，但每次細細杯，飲少少，high high哋好relax！」DaDa也嗜甜，她說：「我食朱古力可以減壓，人哋越減越瘦，得我係越減越肥，我可以輕而易舉K.O.一盒大金莎。」
DaDa指彭浩翔（左）及杜汶澤都是其生命中的貴人。資料圖片
DaDa愛吃甜品及喝酒，兩者都可助她減壓。
DaDa雖遲來先攞獎，但她不想跟別人比較。
後記：傾右的女神
傾左？傾右？別誤會這是DaDa的政治立場，其實她是無黨派，純粹因為貪靚，所以拍攝前，她特別要求攝影師主力拍其右臉頰，DaDa說：「我覺得自己右邊臉上鏡啲，平日主要用左臉食嘢，又𡁻香口膠，搞到有啲大細臉，我盡量會叫攝影師遷就我右臉頰出鏡。」DaDa全程chok爆右臉。
from:
http://hk.apple.nextmedia ... 130421/18234825
