現年50歲的羅嘉良，跟前妻方敏儀育有14歲囝囝羅裕珹，去年羅嘉良與現任內地太太蘇岩造人成功，小蛇女昨日在港安醫院出世，重7磅多，母嬰健康。羅嘉良昨日更邀請記者直擊醫院育嬰房，任影唔嬲。
再為人父的羅嘉良昨日親陪愛妻進產房，蘇岩昨早7時多出發往醫院產女前，不忘於微博留言說：「一大早起來洗了個澡，貼了張面膜。快到見面的時間了，媽咪已經OK，你準備好了嗎，羅小姐？『老公，走！生孩子去！』」
昨午4時多，第二次做爹哋的羅嘉良在醫院門口親證喜訊，一臉于思的他說：「非常順利，太太今日下晝開刀，佢半麻醉生產，好勇敢。囡囡7磅3、4安士，中文名未改，英文叫Sela，係希伯來文。囡囡剛出嚟，佢好快喊咗出嚟，我哋聽到佢把聲好感動，囡囡雙眼好大，眼同嘴似媽咪，鼻就似我，我同太太都有喊。」曾為長子剪臍帶的羅嘉良笑言今次十分淡定，被問到會否追多個？他指要跟蘇岩商量，問到怎樣獎勵老婆，他說：「愛係最好。」
羅嘉良穿上哈哈笑圖案T裇，正顯示他的愉快心情。蘇岩自爆敷完臉膜便進院剖腹生女，囡囡重7磅多，母女健康。微博圖片
羅嘉良的愛女Sela昨日在港出世，樣子果然似足媽咪蘇岩。羅嘉良有女萬事足，昨日抱着孻女即情不自禁錫囡囡。
搵尿片贊助
羅嘉良透露稍後安排蘇岩到深圳的月子中心坐月，他說：「視察過，唔擔心內地有H7N9，奶粉都有贊助，𠵱家搵緊尿片贊助。」羅嘉良曾被拍到對着懷孕太太吸煙，無意戒煙的他尷尬說：「我已企開啲。」羅嘉良為了跟囡囡來個chok爆父女照，他臨入育嬰房時不停撥頭髮，但卻未見他洗手便抱B。
from:
http://hk.apple.nextmedia ... 130419/18232620
