50歲的羅嘉良跟第二任內地演員妻子蘇岩結婚3年夫妻恩愛，前日嘉良拖懷孕8個月的巨肚老婆，到銅鑼灣揀B女衫裙，兩人全程十指緊扣表現甜蜜，還大晒左腳的恩愛紋身，嘉良孭的背囊更扣上兩夫婦的肖像襟章，想不到年逾半百的嘉良仍有這份浪漫情懷，不怕肉麻高調晒愛！
師奶殺手羅嘉良08年跟方敏儀離婚，結束10年夫妻關係，兒子羅裕珹由前妻照顧，回復單身的嘉良火速娶曾合作拍電視劇《完美結局》的內地有米花旦蘇岩，他們在劇中扮恩愛夫妻，結果戲假情真，拍拖四個月即閃婚，09年12月拉埋天窗。
懷胎8月晒恩愛
娶了有米老婆的嘉良，離開無綫後轉戰內地做跟得老公兼賺人仔，去年10月嘉良宣佈老婆懷孕3個月，兩人興奮迎接愛情結晶出世，快將再為人父的嘉良，近日帶巨肚老婆返港，前日傍晚5時許兩公婆拍拖出巡銅鑼灣，現懷有8個月身孕的蘇岩肚大如籮，腳踏平底鞋的她行得小心翼翼，嘉良全程十指緊扣護實老婆，兩人左腳踝有恩愛紋身，而嘉良所孭的背囊更扣上兩公婆肖像襟章，兩人招遙過市不怕肉麻高調晒愛。
懷孕8個月的蘇岩臨盆在即，愛妻心切的羅嘉良前日緊張拖實巨肚老婆。
【齊晒左腳紋身】【襟章高調晒愛】
嘉良夫婦去了利園的BB用品樓層揀衫和嬰兒用品，專睇以粉紅、白色為主的女嬰物品和裙仔，似乎腹中胎兒是BB女，不過嘉良和老婆逛了幾間店舖都沒收穫，十分奄尖。嘉良離開BB用品店後接受訪問，他透露老婆懷孕8個月，問知否是仔或女？蘇岩偷笑，嘉良即醒目封嘴，望住記者做鬼馬表情說：「知道，但唔話你知。」
逛阿徐潮店齋睇
之後二人離開利園，在街上左望右望，似乎近年長居內地的嘉良對香港的街道變得十分陌生，難怪嘉良突然主動走前問記者：「徐濠縈係咪有舖頭喺附近？」記者答轉彎就是阿徐的潮店Liger，嘉良遂請記者帶路，他坦白說：「其實我同Eason（陳奕迅）好friend，專登嚟佢老婆舖頭睇吓有冇嘢啱買，聽聞上面啲裙好靚，希望Eason睇到你拍嗰條片。」
蘇岩和嘉良專睇B女衫，相信腹中胎兒是女嬰。嘉良上徐濠縈潮店Liger朝聖前，高舉V字希望好友Eason會睇片。
嘉良和老婆十指緊扣在銅鑼灣行街街，幸福滿瀉。
記者即帶嘉良兩夫婦去Liger，嘉良臨上樓前還刻意對鏡頭做出V字勝利手勢，擺明是做給Eason看的，不過，他們上去睇了半小時，最後都兩手空空走，阿徐的潮店沒有大肚婆裙，蘇岩當然揀不到心頭好，相信她要產後成功收身，才可以幫襯阿徐的潮店。
from:
http://hk.apple.nextmedia.com/entertainment/art/20130320/18200685
