吳千語早排同男朋友林峯去咗歐洲、日本好幸福咁遊埠，據聞佢仲買咗好多戰利品，不過女仔買嘢又點會夠，加埋男朋友去咗橫店拍劇，林峯仲因為內地禽流感爆發，所以禁止千語BB北上探班，冇得上去陪男友，最好嘅發洩自然係濕平啦。前日下晝5點幾鐘又見到俾人封為千語BB嘅佢，同助手喺中環ifc三樓出現，仲去咗一間時裝店揀衫。千語BB打扮樸素孭住個紫色袋，唔知係咪歐遊時林峯買畀佢嘅禮物之一呢？千語BB一入到去時裝店，就好醒咁攞起本目錄猛咁睇，見佢仲不停問店員同助手意見，睇得好認真。
因為內地禽流感爆發，所以林峯禁止女友北上探班，冇得陪男友，千語BB惟有自己濕平解悶啦。
愛鮮艷顏色
千語BB睇咗5分鐘左右就揀咗幾款衫入試身室，佢搵嘅顏色都好鮮艷搶眼，唔係螢光綠就係桃紅色，都係今季流行色調，最後都係睇唔啱，佢就改為專攻頸巾同披肩，將每條披肩都披上身試，仲索性披住嚟揀試吓保暖作用。到最後佢助手發現咗記者，就行咗出嚟話千語BB喺度揀衫出活動，冇乜嘢特別喎。
from:
http://hk.apple.nextmedia.com/entertainment/art/20130410/18222483
