王君馨和衞蘭（Janice）一個屬演員、一個屬歌手，不過信仰卻拉近彼此，因而成為了不可多得的好姊妹！當君馨大爆對方遲到壞習慣時，搞得Janice尷尬篤手指，難怪Janice主動要求君馨對她發脾氣，不過君馨見到如此可愛的Janice，當然嬲唔落，還即時怨氣盡消！
衞蘭（左）和王君馨曾結伴以素顏睇騷，不拘小節。衞蘭（左）和王君馨雖同樣性格洋化，但二人聲稱全靠「祂」才會連在一起。
回憶相識時……
王：記得我仲喺紐約生活時，已經聽過Janice你嘅大名！我阿哥有一日話有個女新人把聲好靚，仲send咗幾首歌我聽，其中一首係《My Love My Fate》，聽完就覺得你應該係鬼妹仔，同埋我覺得你把聲係真係好Sweet！之後2009年高皓正帶我返教會，就係咁識咗你，但當時唔太敢同你傾得好埋。
衞：我都知道你係個跳舞好叻嘅藝人，雖然當時未聽過你唱歌，不過我知你帶領過團契。因為我份人好靜，而你又好嘈、講嘢好大聲，當時我諗應該冇可能同你咁friend！
同一個信仰把二人的心打開，成為摯友。
王君馨及衞蘭在這塊紅磡海旁的草地上有着不少溫馨回憶。
王：但後來就變得愈來愈friend呢！我記得有次我要喺慈善跳舞活動上表演，但我整親隻腳，跟住你竟然跪低向我隻腳祈禱，當時真係好感動！之後我表演嘅時候居然完全冇事，真係好神奇！
衞：哈哈！我反而記得另一件感動事喎！平時我喺香港開騷，團契嘅弟兄姊妹都會到場為我祈禱，2011年我喺廣州開演唱會，去到突然覺得冇晒啲朋友。臨出騷前，我真係好緊張，但你竟然同另一位姊妹出現喺我眼前！嗰一分鐘真係想喊，但我又化晒妝，又就嚟出場，但真係好感動！
王：呢件事真係好神奇，我嗰日本來要返工，但臨時取消咗，突然就諗起你個演唱會，於是我同個姊妹講要喺唔畀你知嘅情況下搭直通車上廣州！嗰日睇你個騷，我哋兩個仲好似小粉絲咁為你歡呼。
衞：我係一個好需要弟兄姊妹支持我嘅人，佢哋好似捉住我隻手去同行，所以我承諾當佢哋有咩事，我都會be there for them，放棄一切去支持佢哋！
互數優缺點……
王：我有時都會諗，我將來個老公會唔會妒忌呢？因為我同你之間嘅感情係同老公唔會有！我亦覺得你會係個好老婆，因為去到你屋企，你好鍾意煮嘢畀人食，究竟你點解可以煮嘢食煮得咁好味？
衞：哈哈，因為自己想食，所以就學煮嘢食，同埋可以服侍朋友絕對係開心事！話時話，我哋有冇試過嗌交？
王：（想了一想）嗯……之前你有少少遲到囉，不過你依家冇啦，仲早到添！我記得有一次本來約五點，我特登約早你一個鐘，點知你真係早到咗！
衞：（篤手指）其實我都係遲過一次啫，不過我都要檢討吓自己。有時我都想你對我發脾氣，少少都好，但你通常好快就無嘢！
王：放心，我唔會嬲，如果你仲喺屋企，唔緊要嘅，你同我講啦，如果要等一個鐘，咁我咪去Coffee Shop等你。
衞：其實你都會feel到我講大話，有次你問我究竟係咪喺架車度，我都坦白話Yes,I am not！
王：你願意講真話都係一件好事，至少你願意保存你嘅真，因為你肯講真話已經係一種Responsibility（責任）！
後記：草地上的「老友鬼鬼」
是次訪問特意挑選紅磡海旁進行，因這地方是她們的集體回憶、是她們友誼的「見證」。君馨與Janice笑言以前她們經常坐在草地上傾心事、吃魚蛋粉。當日她們重遊故地時，鬼妹仔性格盡現，一大堆「雞腸」傾巢而出，即使看到天上的鷹、海上的魚，她們有如三歲細路般雀躍萬分，不時手指指，乜都笑得一餐，直率坦白得可愛，亦令小記終於明白甚麼是真正的「老友鬼鬼」了！
採訪：文珊
化妝：Samuel@A&V Make Up School、Henry Li
髮型：Sunny Yu@Hair Culture、Patrick@HH
From:
http://orientaldaily.on.c ... /00282_070.html
