郭富城近日在紅館開騷，殺出苟芸慧挑機踩場，城城正印女友熊黛林（Lynn）前晚在中環出席活動時發表「大婆」宣言，寸爆指緋聞是爛桃花的苟芸慧：「唔好惹咪冇事。」Lynn更開綠燈，不介意城城再傳緋聞，並揚言感情要互相尊重。
熊黛林、Jessica C.、Janice Man（JM）與師妹JW等，前晚在中環出席Dior香氛活動，JW谷胸露出3吋事業線搶JM風頭。對於苟芸慧「靚位」捧城城場，Lynn表示：「OK啦，我鍾意好似fans咁一齊癲一齊跳，我寧願坐第一行同佢握手，會睇多場，都未夠。」
熊黛林前晚現身無懼苟芸慧挑機威脅，仲好風騷咁晒玉背，派埋定心丸話對城城絕對信任㖭！苟芸慧日前現身捧城城個唱場，重溫二人《天機密語》的開心時光。
傳出緋聞後，城城將愛駒名字由「愛河」改做「愛將」，Lynn表示不知情：「佢哋揀名，好先改。」問Lynn覺得苟芸慧靚嗎？她說：「未見過佢真人，睇相好sweet。」城城經理人小美送演唱會門票給樂易玲，樂小姐同苟芸慧捧場，會否覺得被剃眼眉落面？Lynn說：「公司畀飛嘉賓好正常，公司安排藝員都要服從。」
古巨基前晚捧城城場，更在後台施展他的辣身舞箍城。JW罕有露出3吋事業線搶Janice Man（左）風頭。
互相尊重信男友
苟芸慧曾揚言與城城的緋聞是爛桃花，Lynn笑笑口說：「哈哈，係咩？爛桃花，唔好惹咪冇事，我好慘，冇桃花。」記者取笑她是真桃花，她表示：「我好驚麻煩，多一事不如少一事，𠵱家有冇桃花都唔知。」對於城城愛車出現苟姑娘住所樓下的緋聞，她力撐：「嘉偉（指沈嘉偉）架車都喺後面，唔通兩個一齊搵，咁無聊。」
提到七年之癢，何不早點拉埋天窗，Lynn說：「慢慢，自己再做好啲，好多方面唔夠好。」她強調不會致電城城查證緋聞。問到她開綠燈給城城傳緋聞？她笑言：「佢唔介意就得，佢處理到冇問題，做嘢控制唔到。最重要係互相尊重，將心比心啦。」有讀者報料，前日早上目睹Lynn乘坐達400萬元、車牌「AK」的麥拿倫跑車，到中環娛樂行，未清楚司機是誰，但車主登記並非城城本人。
此外，熊黛林昨日接受商台訪問，榮升城嫂後，外界一直集中在戀情上，忽略了工作，她笑說：「支筆喺人哋度，控制唔到，我做好自己嘢咪得！」有否計劃今年結婚兼退出？她只說：「工作同家庭對我都咁重要！」
from:
http://hk.apple.nextmedia.com/entertainment/art/20130323/18204320
