林峯有了新戀情，最近他公開指不希望女友吳千語拍咀戲，幸好《忠烈楊家將》講忠孝仁義而非男女私情，林峯毋須為角色獻咀，林峯也很公平，除了千語BB，其他人他不想獻吻：「咁多年嚟，除非劇情需要，我係避得就避，真係遇過好多劇情唔需要，為錫而錫case，可以用其他嘢代替。」
林峯不介意與女友吳千語合作拍戲。
「應該點就點」
大方公開戀情後，林峯剖白心底話：「拍拖係人之常情，由一開始我都冇諗過要隱瞞，我從來冇set過自己係偶像派，冇話每次行出嚟都set個靚樣，只想專心做好每個角色，但唔係話冇束縛，我哋好想有私人空間，應該點就點，咁講唔係自我，最重要知道人生追求啲乜，我唔可能因為工作而冇愛情冇咗自己。」他坦言沒去了解fans有多接受吳千語，他說：「我做緊一樣正常行為，錫我嘅人應該祝福我，兩個人一齊為乜要咁辛苦？我光明正大囉！我𠵱家認真面對人生。」事業搏殺期，但愛得投入的林峯聲言的確有認真想過結婚問題，他說：「我都三字頭啦！每個男人都會有呢個諗法，我冇偶像包袱。」
雖是合作拍戲撻着，成為情侶後，林峯可會抗拒和女友合演情侶？他說：「唔會，我覺得冇避開嘅必要，反而覺得一齊拍戲有更多機會相處。」
from:
http://hk.apple.nextmedia ... 130323/18204256
