上周三（13日），媽咪姐好敬重嘅資深藝人江毅，因肺癌喺灣仔律敦治醫院病逝，會喺呢個月30號於紅磡世界殯儀館設靈，31日出殯。
享年80歲嘅江毅冇結過婚，縱橫娛樂圈50年，亦從冇傳過緋聞。雖然有傳江毅有不同性取向，不過佢啲friend話俾媽咪姐聽，佢後生時都追過女仔㗎！呢個女仔係邊個？咪係至今同樣都獨身嘅「余毛」余慕蓮囉！
媽咪姐梗係即刻問下余毛有冇件咁嘅事？佢話：「好耐之前嘅事啦！」幾耐之前？余毛𠵱𠵱哦哦：「唔記得嘞！啲人傳啫。我哋都冇真係去過街。嗰次我同曉華姐（TVB梳頭阿姐）走㗎！佢有佢走囉……」咦？咁即係邊次呀？「唉呀！唔記得嘞，可能因為我又冇結婚，佢又冇結婚，所以啲人敏感啫！」余毛講咗幾句就猛話佢唔得閒。
唉，余毛，即使真係拍過拖，都係美麗回憶啫！使乜急急否認呢。話晒余毛同江毅喺79年已經喺鄭少秋主演嗰套《楚留香》拍過檔，識咗起碼超過30年，有感情又有幾奇呢？
江毅同余慕蓮相識多年，偶然都會喺公開場合撞到，仲企埋一齊合照㖭！又OK襯喎。江毅冇做過男主角，但所演嘅角色令人印象深刻，好似《射鵰英雄傳》入面嘅柯震惡，好有盲人神髓㗎！
獨居嘅江毅，幾個月前先開始請外傭照顧自己。呢位外傭話，依家負責看屋，執吓江毅嘅遺物。睇廳中掛咗兩幅國畫，就知前輩藝人確係有內涵。
