梁烈唯、李治廷、Janice Man（JM）同林盛斌（Bob）前晚8點半喺中環嘅蘇豪區拍葉偉民導演嘅新戲，不過套戲暫時未有名住。佢哋成班人集中喺一條斜路嘅鐵皮屋麵檔度拍攝。場戲好簡單就係講梁烈唯同李治廷一班人幫襯阿Bob嘅麵檔消夜，而JM放工行過斜路同佢哋打招呼。
唯唯做乜嘔呢？又飲大咗累事？原來佢拍場食麵戲，前後拍咗幾個take，食到飽得滯咪惟有嘔返出來囉。
唯唯就食到要嘔返出嚟，阿Bob就趁空檔食飽撩牙。阿Bob近期演出機會大增，𠵱家仲有機會現身大銀幕。
不停食麵成粒鐘
唯唯喺呢場戲裏面食緊碗麵，本來劇情好簡單，但係呢個鏡頭前前後後拍咗5、6次，每次都見佢塞到成口麵，而麵檔老闆每個take都會煮碗新麵畀佢食，頭一兩次唯唯都好有衣食，將口中嘅麵吞落肚，不過去到第三碗佢開始頂唔順，每一次導演叫cut唯唯都第一時間走埋一邊吐返含喺口裏面嘅麵出嚟。呢個食麵鏡頭前後都拍咗成粒鐘，而JM就配合好時間出現梳頭同化妝。趁住空檔時間李治廷好好學咁走埋葉偉民度睇重播，仲同導演研究鏡位，唯唯就同阿Bob走埋一邊吹水。
每次拍完一個鏡頭李治廷都會去導演度睇返重播。JM喺戲裏面當然唔會浪費佢對40吋長腿，不過對鞋太高，行起斜路就要小心。
from:
http://hk.apple.nextmedia.com/entertainment/art/20130321/18201833
