由周麗淇謝天華孭飛嘅新劇《女警愛作戰》，同劇演員星期一晚（三月十一日）約埋去長沙灣開餐睇首播。
之前一日，大隊亦去咗馬鞍山做宣傳，謝天華當眾踩周麗淇身材差，又話同劇其他女警呂慧儀、王君馨、朱慧敏、朱璇等等等，個個都比周麗淇「大」，包括對眼。俾人兜面質，周麗淇當日還擊火力僅得兩成：「佢（指謝天華）喺戲入面叫賤精，現實生活都好賤。」
第二日，周麗淇見各大報章都用自己副身材做標題，去到煲劇飯局一見到謝天華，「唔岔皺」第一時間再還拖，郁手要除開對方用嚟包住個嘴條圍巾，又起腳攻擊小天華。一切作狀，唔做好過！
除唔到謝天華條圍巾，周麗淇出手又出腳，對正小天華位置進攻。
冇身材，周麗淇唔怕見人就攬，左擁謝天華，右攬許紹雄。
星期日嘅宣傳活動，有人扮水貨客，另一批人扮示威人士，身為「女警」嘅周麗淇要出嚟維持秩序，同講出佢哋犯咗邊條罪，為怕講錯，無綫幫佢預備咗張「貓紙」，點知俾謝天華一手搶走咗。
劇中所有「女警」一字排開，論身材，周麗淇確係最輸蝕一個。
