踏進新婚抗癌港姐林淑敏的安樂窩，露台的非洲灰鸚「笨笨」即發揮好客精神，熱情打招呼，非常有家教。笨笨三年前發生意外失去右腳，獸醫建議把牠人道毀滅，幸熱愛生命的林淑敏反對，並悉心照顧單腳鸚，笨笨得以保命活出未來。
林淑敏笑言家中的兩頭臘腸狗和鸚鵡都是壞分子，破壞力甚強。
無線女藝人林淑敏三年前受乳癌折騰，從不忌諱人生荊棘，她希望用自己的經歷鼓勵戰鬥中的癌症病人，她回想抗癌後在家休養的一段日子，全憑家中寵物三頭臘腸狗、一隻烏龜和一隻鸚鵡作伴，陪她度過那段艱難歲月。牠們就像林淑敏親人，對她無限支持。
陪瞓療傷
林淑敏堅毅抗癌背後，家中飼養的5歲非洲灰鸚也經歷了一段黑暗歲月，右腳在三年前被玩具纏繞致斷肢，林淑敏說：「當年我哋帶佢睇醫生，獸醫話冇得救要人道毀滅，我同男朋友商量過，堅信人截肢都生存到，雀仔都應該可以。我哋搵咗最好嘅獸醫，用咗兩萬幾蚊同佢做手術，保住條命。」
單腳鸚笨笨一度痛不欲生，幸好林淑敏花上幾倍耐性和愛心，不眠不休照顧做完截肢手術的笨笨，她說：「鸚鵡會單腳企喺度瞓，但做完手術嘅笨笨好弱，我就當佢ＢＢ一樣抱住佢瞓，畀安全感佢。等笨笨傷口癒合，我就幫佢換咗個倉鼠籠做安樂窩，底部鋪咗木糠，等佢舒服啲。」
笨笨花了大半年逐漸康復，牠也慢慢學習用單爪配合尖嘴在籠邊攀爬，現在即使單腳，動作都非常靈敏，加上鸚鵡天生聰明，不時模仿主人講話，更得林淑敏歡心：「我哋講乜，佢就跟住講，有時無啦啦佢拋一句出嚟，真係笑死人。佢最鍾意學我喝止兩隻狗，語氣都似到十足。」笨笨跟家中的臘腸狗相處融洽，林淑敏說：「笨笨好醒，當佢想兩隻儍狗陪佢，就會叼住啲糧掟出籠外，引為食狗過嚟，但笨笨唔鍾意佢哋嘅時候，又會叫佢哋行開。」
林淑敏表示鸚鵡要多曬太陽才會健康。
獨腳鸚鵡笨笨一點都不笨，看到主人林淑敏咬著花生，即現為食相。
笨笨貪玩令右腳斷肢，但生命力頑強。
識賣口乖
飼養鸚鵡其實也有竅門，林淑敏說：「鸚鵡好需要曬多啲太陽，同埋食多啲鈣質食物，咁樣佢哋先會健康，毛色先有光澤，我除咗畀佢食乾糧，間中會獎果仁同生果畀佢。」當日訪問完結，笨笨知道客人要走，賣口乖猛講拜拜，林淑敏說：「一定要同番佢講拜拜㗎，唔係佢會唔開心。」
草草看到主人吃零食，牠醒目去討吃。
為食孖寶偷食扒
林淑敏原本收養了三頭臘腸狗，牠們是三兄妹，可是狗女「花花」早前心臟病離世，現只剩下兩兄弟「草草」和Popeye，牠們是為食孖寶，經常孖咇出更搵食。林淑敏說：「佢哋好為食，乜嘢都食一餐，我嘅零食要收得好埋，否則返到屋企冇得剩，試過老公買牛扒返嚟準備煎，放喺枱一陣，轉頭行開返嚟，成塊生牛扒畀佢哋食咗，激到佢紮紮跳。」
草草和Popeye雖然是老狗，但精力旺盛，最愛通屋跑，林淑敏為減弱這對破壞王的威力，不時出絕招：「我得閒就帶佢哋出去散步，消耗嚇佢哋嘅精力，佢哋對陌生人一樣熱情好客，我唔敢將間屋交畀佢哋看管，怕佢哋搖尾歡迎啲賊仔。」
