俾老闆陳百祥（阿叻）踢爆想結婚嘅賈曉晨（JJ），噚日同林子善喺西九龍中心出席打機活動，當大家諗住JJ點樣出招反擊啱啱加盟嘅E神楊焉（Carol）嗰陣，JJ居然密實出現，好失望囉。大會安排咗着住中國服嘅小朋友送花畀JJ，主持問佢叫乜名，小朋友話：「阿皇。」主持話佢係樊大皇，擺明搵JJ男友樊少皇搞笑。
咁密實係咪自我放棄？JJ話：「唔係，着衫都要睇場合。」叠埋心水結婚？JJ表示拍拖當然想有好結果，但佢強調唔心急嫁人，不過JJ承認：「我有問叻哥，如果冇進步先諗結婚，但我想努力做嘢先。」係咪唔同阿叻續約？JJ表示月尾約滿，有唔少公司搵佢，JJ的確想仔細諗吓去向，但佢強調𠵱家未有答案。
樊少皇有冇畀意見？係咪想養你？JJ話：「好多人錫我，話我想點就點。目前我唔需要人養，自己有能力。」
from:
http://hk.apple.nextmedia ... 130317/18197707
