喺08年同倪震舌戰蘭桂坊，一啜成名嘅城大校花張茆，早幾日嫁咗畀老外K先生，張茆仲喺婚禮以deep V婚紗大晒4吋事業線，幸福滿瀉。雖然倪震家有嬌妻周慧敏，但𠵱家嘅行為同生活十足孤獨老人。
成個人脹咗加埋啲鬚嘅倪震，望落老咗唔少，唔止冇晒09年娶周慧敏嗰陣嘅意氣風發（小圖），仲竟然變成要煲碟解悶嘅dry爆中佬。
前晚大約10點，倪震單拖現身跑馬地，近年老婆周慧敏主力幕前搵銀，佢就隱身幕後搞生意，所以倪震都冇乜點keep，望落唔止有啲中年發福，加埋留咗嘅山羊鬚同特大黑眼袋，48歲啫，搞成咁呀！同當年啜張茆嘅孔雀開屏look比，直頭兩個人。
主攻美國劇
倪震首先去咗一間叫電影地帶嘅影碟鋪睇碟，佢專攻美國連續劇，企喺櫃位望咗好耐，每隻碟都睇成5分鐘，研究劇情同選角，揀咗半粒鐘至租到兩套碟。之後倪震去咗附近嘅櫃員機撳錢，跟住就返去跑馬地金山花園屋企，結束今次中佬dry爆之旅。
from:
http://hk.apple.nextmedia.com/entertainment/art/20130314/18194427
