周慧敏（Vivian）為紀念入行25周年，將於3月19、20日在紅磡體育館舉行兩場「DeepV.25周慧敏演唱會」，她昨日為隆重其事穿上Escada Resort晚裝襯2,500萬鑽石首飾在紅磡出席記者會。她解釋演唱會取名Deep V並非以低胸服裝為主題，真正意思是想和歌迷作一次深情、深入、深交的接觸，她說：「作為表演者喺舞台上出現，25周年係一個奇蹟，我唔重視藝人呢份職業所帶畀我嘅名譽，但喺咁多年以嚟，我結交咗好多友誼，到時出現喺我演唱會嘅嘉賓都會好多。」
至於她的初戀情人，以及前男友陳德彰，甚至劉錫明等會否也受邀請擔任嘉賓？Vivian說：「初戀情人係讀書時嘅事，已經冇聯絡，陳生係我以前男朋友，但都好耐冇聯絡，如果佢嚟捧場我會好開心，但劉錫明就唔係舊情人。」
闊別紅館5年再開演唱會，她覺得有點難以適應，Vivian說：「我husband（倪震）見我早起好肉赤，叫我唔好搞，我話3月之後先好哦我，家我做公主，大家好就我，有免死金牌，不過呢個月都瘦咗4磅，忙到冇食飯時間，keep住107磅好睇啲，之前比較圓潤，husband瞓前整消夜畀我食，整腸仔畀我進補，仲有餃子。」
此外，問她會否擔心外界會有閒言指倪震要太太開演唱會賺錢？Vivian說：「係都唔做演唱會啦！拍廣告輕鬆好多，為咗呢個騷推咗好多job。」
from:
http://hk.apple.nextmedia ... art_id=14832196
