周麗淇(Niki)、謝天華主演嘅無綫新劇《女警愛作戰》前晚首播，成班演員約埋去長沙灣飯敍睇首播，拗柴嘅李綺雯紮住隻腳踢拖現身，仲唔小心春光乍洩㖭。Niki同天華就鬥遲到，喺劇集播出前5分鐘先趕到，嚟到現場兩人又狗咬狗骨係咁鬥嘴，Niki叫天華做賤精，天華又叫佢做八婆。做訪問時Niki同天華繼續各不相讓，Niki指天華演出乏味，天華語帶相關話：「我要做嘢㗎，好似啲人咁咩，做少奶奶，佢係福將嘛。」Niki即還擊話天華出名孤寒。
周麗淇同謝天華前世好似撈亂骨頭咁，喺現場鬥嘴互不相讓。負傷嘅李綺雯顧得隻拗柴腳嚟，又唔記得上面防走光。
Niki被彈成日喊
最近兩套無綫劇集《戀愛季節》同《心路GPS》做極收視都唔到30點，前晚《女》劇第一集平均有28點（約180萬觀眾收看），最高仲去到31點（約199萬觀眾），唔知關唔關福將Niki事，但網民就似乎唔多滿意，大彈佢做差婆竟然成日喊，唔夠當年關詠荷做嘅《陀槍師姐》咁硬淨有型。
from:
http://hk.apple.nextmedia.com/entertainment/art/20130313/18193202
