林峯噚日去咗尖沙嘴為「The One x Pingu冰上奇趣之旅」揭幕禮做嘉賓，Pingu fans甘比帶埋囡囡劉秀樺，仲有甘比妹陳諾韻撐場。
大會請人扮嘅Pingu公仔，聲稱要送林峯「五千」斤重嘅「五千魚」（吳千語）做禮物，林峯俾人玩都唔知，事後仲甜笑話：「係咩？我真係反應遲鈍，五千斤魚，我以為係個logo，但無傷大雅，大家戥我哋開心，不過前兩日我哋去睇戲，報道話係睇三級片，其實係睇另一部戲，我講咗會正常拍拖，大家見到唔使大驚小怪，亦唔使每次出嚟都講一次。」
林峯收到同吳千語BB發音差不多的「五千魚」紙牌做禮物，笑得好開心。甘比帶囡囡一齊睇林峯，劉秀樺更着住Pingu衫，但未見甘比個囝囝。
收拾心情橫店開工
經過多次把臂外遊，林峯話開工就要收拾心情，月中會去橫店拍劇，到時要同千語BB暫別一段日子。
問想唔想女友探班？林峯話：「唔知，不過中間要做宣傳，都要周圍走，最緊要唔好影響工作，我哋自己會調節。」林峯話會同BB互相鼓勵，問佢畀唔畀BB拍接吻戲？佢露咗底話：「工作需要啫！不過最好唔好啦！」
from:
http://hk.apple.nextmedia.com/entertainment/art/20130311/18191044
