早排唐詩詠俾人發現行車證過咗期三個禮拜，依然揸住架車通街走，事後佢解釋話自己大頭蝦唔記得續證，又話已經即時處理，暫時唔揸車，唔會再違法。
大頭蝦？八珍原本半信半疑。星期日（三月三日），《壹》仔影到唐詩詠攞住杯雪糕入鞋袋專門店，舉一反三，佢份人唔只大頭蝦，仲唔知分寸！
下午三點零，唐詩詠同個女朋友一齊行ifc，由OL至愛嘅ZARA，到名牌TSUMORI CHISATO，通通都望兩眼，冇幫襯；之後行過提供試食嘅意大利雪糕店，唐詩詠試啱味道再俾錢買兩球。
食住雪糕，平日斯斯文文嘅唐詩詠當堂冇晒儀態，大大啖擺入口，仲食住行入人哋鋪頭。
食住嘢踩場，唐詩詠小姐，話晒你係公眾人物，開口話你，都唔好意思啦！
試完味先扑槌買，唐詩詠心急到用條脷舔雪糕，好味！
邊行邊食，行到入鞋袋專門店都照食，好在冇俾sales請佢出門口。
同緋聞男友馬國明一齊錄節目，男方話萬一唐詩詠因為行車證過期俾人拉咗，會去差館保佢出嚟！
