閣下冇睇錯，周秀娜真的變成周「瘦」娜！與陳偉成（Avis）分手個半月的娜姐到泰國重遊舊地，昨日在Instagram上載震撼的皮包骨比堅尼照，就連D Cup上圍也縮剩B Cup！娜姐雖否認患厭食症，但亦坦言現時體重是發育後最低點，瘦剩88磅，不過定必會重點催谷咪咪：「佢哋一定返番嚟！」
2010年D Cup肉背
娜姐上載皮包骨「影後」照及喪食照，但比她３年前的索樣，現時瘦得嚇人。娜姐昨晚出閘後見記者到場，強顏歡笑，強調身材沒走樣。
沒有最瘦，只有更瘦！以無敵身材自居的周秀娜，自1月底宣布與男友Avis分手後，被傳患厭食症，隨後她出席活動一次比一次消瘦。近日娜姐放大假與家人到泰國旅行，往年同樣時間與Avis到泰國還神的她，重遊舊地難免觸景傷情，娜姐昨午準備離開泰國返港，臨上飛機前在Instagram上載一張皮包骨三點式照，真係瘦到冇朋友！只見娜姐坐在泳池邊抱膝，尾龍骨及肋骨凸現，認真我見猶憐！其32D上圍更急降兩級，驟變B奶，對比她2010年月曆的露背寫真，簡直判若兩人，有「娜粉」也不禁留言嘆謂：「食番多啲嘢啦！」據知，娜姐出道平均體重有100磅，如今跌剩88磅。
為新片狂做運動
本報致電未上機前的娜姐，聽到記者心痛她皮包骨，她說：「我已經盡量食肥啲，其實去咗4日，1日已經食4餐，可能做運動做得太犀利，加上嚟緊代言減肥產品，食完太有效，所以搞到咁骨感！」她還不忘自嘲：「一世人點都要骨感1次，但好快會油浸番！」
娜姐又否認為情患上厭食症：「同厭食冇關，唔信可以同我食飯！亦唔係為情消瘦，總之我好健康好開心，只怪嚟緊要拍戲，導演畀好大壓力我，覺得我好似識三樓跳落嚟，所以狂做運動！（跌剩88磅？）真係歷年最低體重，但佢哋（指上圍）好快返嚟！」她補充近日亦已沒跟Avis聯絡：「大家都冇搵對方，都各自各生活喇！」
強調身材沒走樣
昨晚7時半，娜姐步出機場，為免顯得過瘦，她刻意穿鬆身衫示人。問她是否覺得瘦到見骨？娜姐說：「唔係，人人都有肋骨啦，一向都好健康！」並強調身材沒走樣，亦沒影響工作。據知，娜姐身邊不乏裙下之臣，可是情傷後心情依然麻麻，才令她食極唔吸收。
from:
http://orientaldaily.on.cc/cnt/e ...0306/00282_001.html
