吳千語和林峯公開戀情，早前甜蜜外遊，被發現兩人忍不住在機艙狂咀及撫摸，又指林峯送黑卡給吳千語狂碌。吳千語昨晚在西九出席活動，遲大到45分鐘，她解釋林峯只是體貼幫她冚被，在無知覺下被男友錫面，「有錫，但冇啜啜聲」！
吳千語否認與林峯在機艙狂咀兼愛撫，解釋只是林峯幫她冚被、錫面珠。
吳千語、Mandy Lieu、Ana R.和李樂詩夫婦等昨晚在西九出席護膚品活動，吳千語遲大到45分鐘，問她可是受例遲的林峯影響？她即連忙否認：「唔係呀，頭先好塞車。」戀情一公開，工作量即時大增？她說：「係之前安排咗，接落㗎，價錢都要問番公司先知。」
「佢幫我冚被」
之前與林峯外遊時，吳千語被影到在機艙內與男友煙韌激咀，又指兩人情不自禁愛撫，吳千語說：「我有睇報道，唔係想澄清，係想講畀大家知，我喺機上時係瞓着咗，佢過嚟幫我冚被，我唔知佢過嚟，我失去知覺，佢事後先講我知，我覺得佢好sweet。」有在場人士指兩人咀到啜啜聲，她即說：「完全冇啲咁嘅事，有錫，但冇啜啜聲，我瞓咗，冇印象，just on face。」
吳千語謂不會告誡男友過份熱情：「我哋係男女朋友，呢啲好正常，嗰度都係機艙，一格格嘅，都係私人空間囉。」有人覺得林峯相當猴擒，吳千語即為男友護航：「唔係呀，嗰個動作，係佢拎起我隻手，幫我冚被咋。」
Ana R.以雪白長裙現身，清新飄逸。Mandy Lieu（右）笑言換新公司如換男友，要小心選擇。
李樂詩和老公恩愛捧場。
為峯媽買Hermès
對於有指吳千語去Hermès狂掃150萬手袋，她否認並解釋只是幫林峯媽咪買袋，但沒貨，最終自己買了一條Hermès手帶送給林峯做禮物。有傳林峯想送黑卡給她，吳千語說：「絕對冇，呢個乜年代？我哋出街會互相送嘢畀對方，禮物係正常，但黑卡就唔係，我唔會接受。」
同場Mandy Lieu表示約滿舊公司，現時食散餐，待拍完旅遊特輯，8、9月才決定新動向，她說：「𠵱家物色新公司真係好似搵男友咁。」
from:
http://hk.apple.nextmedia.com/entertainment/art/20130306/18185651
