甄妮咬住狂插G.E.M.：咁認真就輸！鄧紫棋（G.E.M.）被甄妮在一月的專訪中，公開指摘不打招呼，目中無人。雖然G.E.M.隨即於微博公開向前輩致歉，可惜對方卻繼續咬住唔放，上周甄妮再在其演唱會上，以她的「小巨肺」稱號暗寸揶揄。
正忙於準備四月紅館個唱的G.E.M.，日前接受本刊訪問時坦言，此事曾令她感到膽戰心驚，痛哭多晚，不過，當看見陳奕迅在頒獎禮上也向甄妮下跪後，她便學會了笑着來面對：「咁認真就輸！」
遭前輩咬住唔放，鄧紫棋G.E.M.曾覺如被鎖鏈鎖住，但如今已感釋放：「你唔郁，你就唔覺佢鎖住你！」甄妮在剛完成的個唱上，以「小巨肺」來開玩笑。
幽默處理G.E.M.被前輩甄妮公開指摘個多月，上周甚至更被對方於演唱會中以「小巨肺」作笑話：「依家個肺都有咁多size真係奇！」更暗寸林欣彤「唱到爆表」、「大嗌都得冠軍」。
對於繼續遭咬住唔放，鄧紫棋G.E.M.只得「哈哈哈」大笑。「我已經send咗個message畀林欣彤，同佢講：『呢個好好笑呀！多謝晒！』唔知點解，今次我知道之後，冇唔開心或者傷心，反而覺得好好笑！第二日連報紙都話我甩難，仲登埋我幅笑嘅相出嚟話：『你睇佢笑得幾開心！』
「我當初都好認真咁喺微博公開道歉，咁樣反而弄巧反拙，我真係喺呢件事上面體會到，娛樂呢樣嘢，認真就輸了！」
忽然開竅，原來因為陳奕迅。「Eason以前都經歷過啲類似嘅嘢，見佢直情跪咗喺台度（港台頒獎禮向甄妮下跪），我就發覺，原來咁嘅處理手法仲好笑，可以將件事變得輕鬆啲，跟住我個人就慢慢free咗。」
鄧紫棋G.E.M.曾在網上公開向甄妮道歉，卻被甄妮反駁：「不如對住牆講我愛你！」鄧紫棋G.E.M.的老闆兼經理人張丹大讚G.E.M.今日已成熟很多，亦表示會邀請甄妮來看四月個唱。
