憑34E巨胸走紅的周秀娜自從失戀後，爆乳身材突然走樣。前晚娜姐在中環出席酒吧騷時，性感程度遠遜老闆娘，被追問是否已拆彈？娜姐即擺樂基兒上枱說：「話我似佢都唔使抄咁足，冇裝過點拆？」
𡃁模出身的周秀娜近年轉型拍劇、拍電影，最近更泊到周星馳碼頭，憑電影《西遊．降魔篇》掹車邊登上億萬票房女王寶座。前晚娜姐在中環出席酒吧開幕活動，即場擔任DJ打碟，娜姐非常錫身僅穿背心、短褲加黑絲襪展現平胸身材，同場的老闆娘則博到盡穿低胸裝，娜姐笑說：「要生意興隆，個包梗要大啦！」被問是否已拆彈？她竟借樂基兒轉移視線說：「我唔識講，雖然話我似樂基兒，但唔使抄咁足，冇裝過點拆？」何解size不同？她九唔搭八避談說：「唔見咗拍拖時間，呢個場合最緊要靚，等我新識多啲新朋友先。」
周秀娜回復單身後，前晚出席酒吧騷時身材突然變得平平無奇，但佢似乎春心蕩漾，話想叫卓韻芝介紹老外俾佢識。
想識老外
娜姐表示歡迎任何男士約會，還借用財爺曾俊華的中產論說：「任何人都可以約我食飯，或飲咖啡，睇法國電影，食法蘭西多士。但香港男仔又好似唔好，可能未食完餐飯、電話未交換，張相已經擺咗上facebook，都係叫阿芝（卓韻芝）介紹外國男仔好啲。」有傳羅志祥（小豬）發功追求她，問二人有否約會，娜姐說：「冇冇冇，連對方電話都冇。」曾被花心男陳偉成（Avis）傷過心，問娜姐是否擔心小豬同樣花心？她說：「同佢合作幾開心，拍戲現場係位專業演員，但做朋友就要相處過先知。」
另外，娜姐最近簽了內地的新亞洲娛樂製作公司，旗下還有張栢芝，對方被指是票房毒藥，問可怕比較？娜姐緊張地說：「我唔係（毒藥），票房大家控制唔到，希望可以同佢合作。」
娜姐憑34E上圍搶攻，但家陣身材走咗樣。娜姐被問係咪拆彈，佢即擺曾隆胸再拆彈的樂基兒上枱。
from:
http://hk.apple.nextmedia.com/entertainment/art/20130303/18182537
