余文樂同吳雨霏（Kary）暗撻三個月，農曆年拍拖歐遊畀網友踢爆「樂雨戀」，其實樂仔入行多年傳過唔少緋聞，當年佢同陳冠希（Edison）爭鍾欣桐（阿嬌）嘅緋聞都好精采。
余文樂同阿嬌當年因拍電影《一碌蔗》傳緋聞。撞膊事件發生前一年，樂仔同Edison錄影《勁歌金曲》時仲握手扮friend。
02年Twins開演唱會，阿嬌仲請男友Edison做嘉賓。
03年1月5日，紅館舉行無綫2002年度十大勁歌金曲頒獎禮，完場後情敵樂仔同Edison喺後台互睥兼膊頭撞膊頭，樂仔爆粗話：「睥乜x？」陳冠希扯火回應：「乜睥乜x呀？」之後Edison上車準備去慶功宴，車外嘅樂仔向Edison舉中指叫囂：「Fxxk you！x你xx呀！有本事落嚟隻揪。」不過亦另有一說法話當時Edison將頭同手伸出窗外，向樂仔做動作，令樂仔解開西裝鈕大叫：「你係咪想打？」
好在最後兩人都冇郁手，事後樂仔承認當晚因情況混亂有碰撞，但冇大打出手，𠵱家過咗咁多年事過境遷，樂仔身邊有Kary，Edison同台灣女友Ann出雙入對，阿嬌亦有韓籍男友。
from:
http://hk.apple.nextmedia ... 130302/18181552
