無綫《2013國際中華小姐競選》前晚圓滿結束，噚日公佈嘅收視平均有21點（約135萬觀眾），最高23點（約148萬觀眾），有咁嘅成績都算唔錯，不過做司儀嘅陳敏之表現就俾網友彈到飛起，批評佢講嘢有懶音，仲狠批佢英文同普通話都唔掂，只係花瓶，仲有人抵死咁補充話係ugly花瓶，敏之噚日喺電話度話：「已經盡咗本份，請大家包涵，我會繼續努力。」
冠軍想入行
噚日冠軍鄧佩儀、亞軍陳楚寰、季軍張名雅、友誼小姐周慧倫同明日之星獎得主宋沁褘一早去咗東莞，領取贊助送出嘅后冠同權杖，師姐苟芸慧、張嘉兒同行，吸引過百人圍觀。
喺比賽着幾次泳衣晒好身材嘅張名雅，否認因只得季軍而感失望：「只係未慣自己嘅號碼，怕行錯出去。」佢強調佳麗嘅裝備都係一樣，只係着泳衣嘅效果唔同，亦都唔會行性感路線。贏咗嘅鄧佩儀就話開心到瞓唔着，且對司儀工作有興趣，返溫哥華讀埋一年大學，先會考慮入唔入娛樂圈。
前晚陳敏之扮到靚靚做華姐競選司儀，點知俾人彈。出爐華姐陳楚寰、鄧佩儀、張名雅噚日返咗東莞領取后冠。
from:
http://hk.apple.nextmedia ... 130226/18177093
