看上去總是楚楚可憐，說話時，氣若游絲，似是弱不禁風，倒想不到，過去10年黃翠如拍旅遊節目最愛流連貧民窟，體驗第三世界的真善美。斷斷續續遊歷了55個國家，鳥倦知還，也想不到，回家路竟然是走入複雜的娛樂圈。伯樂余詠珊一手提拔，為愛徒穿針引線，毫無拍劇經驗的黃翠如，加入無綫就可以做到女主角。黃翠如未學行，已經要跑，前路有幾長，要跑幾遠，她不知道，不過，她倒有心理準備，隨時被out。
31歲的黃翠如剛加入無綫便擔正女主角，難怪有流言蜚語，她對此只求努力做好工作，讓大家接受自己。
在無綫新劇《心路ＧＰＳ》中，黃翠如和陳展鵬（中）有不少對手戲。黃翠如和有線舊拍檔梁嘉琪（左）在《心路ＧＰＳ》中合作。
電視戰發生，電視台的意識形態劇變，因為人手短缺，出現好多畸形現象，31歲電視台新人黃翠如在有線和now做旅遊節目主持，拍過兩部電影，卻從未接觸過電視劇，加入無綫之前見過戲劇組大家姐曾勵珍，然後第一部劇集《心路GPS》拍住視后李司棋，擔正做第二女主角。
與梁嘉琪少聯絡
黃翠如直認是電視戰孕育出來的畸胎，她日前說：「我都覺得係，如果唔係電視台挖走咗好多人，如果唔係我哋公司好多人去咗內地拍劇，我呢啲人係冇可能生存到，我好認同。嘉琪（梁嘉琪）都話，我呢個case係一個好奇怪嘅case，我相信應該係。我冇演出經驗，30歲仲係新人，我真心講，我係好好彩嘅人，正如我第一次拍電影，嗰兩套係女主角，我自問條件唔係好好，所以無論以前喺Cable到𠵱家喺TVB，我都好好彩。」
黃翠如在第三世界學習的生活態度，嘗試套用在複雜的娛樂圈，她希望尋找最真實的答案，她天真地說：「我入嚟個位咁好，呢樣我好驚訝，坦白講，我嘗試問點解，但係我問唔到，我有問過啲監製，跟住佢哋話唔係我諗得咁複雜係啲乜原因，兩個都係新監製，佢哋都話鍾意用新人，咁TVB唔夠人，佢哋仲話我作為新人都未做好自己啲戲，調番轉喺度諗點解你可以做戲，會唔會係浪費太多時間呢？咁我都覺得係㗎！」
電視城有非戲劇製作總監余詠珊助陣，老友梁嘉琪又在無綫五年，陸浩明和洪永城更先後加盟，黃翠如初來報到，大家認定她有一群同黨可以通風報訊，今日她竟然是孤軍作戰，重感冒的黃翠如用氣聲回答這個問題，我見猶憐，她說：「我以前喺出面做嘢，有乜事都會打去問Sandy（余詠珊），入咗TVB都冇搵過佢，咁耐以來，都喺走廊見過兩三次，都係點吓頭問候吓。」梁嘉琪同門出身，本應同聲同氣，如今卻甚少聯絡，黃翠如說：「入嚟我都冇搵佢傾，嘉琪係一個好實在嘅女仔，你畀乜佢做佢就做，佢喺呢間公司五年，好清楚呢間公司向前走，大家喺度排隊。」
以往黃翠如做旅遊節目以肯搏見稱。資料圖片
「聽到閒言閒語」
沒錯！當大家正在排隊，黃翠如卻突然被強行擠在前面，難怪未能服眾，又招人妒忌，她說：「間中都聽到閒言閒語，好似𠵱家咁，有人會覺得我有關係，所以可以做女主角，都係類似咁！」不過，黃翠如不是想像中的弱，今日的流言蜚語對她絲毫無損，她說：「我第一次聽到呢啲嘢係我拍電影嗰時，聽過類似嘅嘢，第一次好傷心，今次只係……點講，我覺得我好好彩，不過，我覺得人嘅運氣會用完，我由細到大都好好彩，所以好快用完，𠵱家係要靠努力，而我嘅結論係努力做好自己，我被人接受就可以行落去，如果被淘汰我就走，我知道無論外在條件，演技同實力，大家都會對我有好多猶豫，我就好似啲病毒，醫得好繼續成長，醫唔好變腫瘤，唔好彩變成惡性cancer，到時要死，我冇諗過掙扎，因為呢行從來冇得選擇，我哋只係被選擇嘅一群！」
from:
http://hk.apple.nextmedia ... 130223/18173771
