熊黛林（Lynn）父親上月在香港過身，男友郭富城全程陪伴，Lynn昨日收拾心情在中環出席Dior活動，同場還有馬德鐘夫婦、「翻版關之琳」Jocelyn和丈夫等。
Lynn穿上紅衫和小短褲，看來精神甚好，她表示心情已回復：「啱啱喺南京返嚟，同屋企人一齊過年，幾開心，南京又搬咗新居，媽咪幾鍾意，大咗又近市區。」
熊黛林公開多謝城城送亡父一程，揚言令她更珍惜身邊人。
問Lynn幾時結婚派利是？她說：「未有咁快。」見她穿上矮踭鞋，莫非有喜？她即說：「未！唔係呀！」城城在熊父喪事上表現備受讚賞，她說：「𠵱家先知要珍惜身邊人，有啲嘢發生咗要接受，學識面對，對身邊人好啲。」是否對城城加分？她說：「多謝朋友送爸爸一程，有心。」Lynn又指自己最近搬新屋，今年不少玄學家指城城會結婚，她即甜笑說：「借佢哋嘅吉言，等自己有自己個家。」不過講完即轉軚說：「唔係針對邊個人，係想快啲有自己屋企，買樓呀，搬來搬去都係租。」
馬德鐘晒恩愛
馬德鐘和太太張筱蘭今年結婚20周年，馬太在微博擺了兩人當年的結婚證書和相片，並留言說：「這是差不多20年前的青葱歲月，你我開始這真實的世界！」馬德鐘昨在活動中表示：「當年好簡樸，去流動嘅註冊站註冊，當年收收埋埋。入行以嚟，每個相士都話我要結兩次婚，今年想求多次婚，等太太好似嫁多次畀我咁，仲會補影婚紗相。」
採訪：林嘉慈
Jocelyn和老公Anthony昨晚恩愛赴會。馬德鐘和太太表示會補影結婚相，慶祝結婚20年。
from:
http://hk.apple.nextmedia ... 130223/18173884
