無綫花旦買少見少，近年不斷起用新面孔。有線小花黃翠如（Priscilla）在高層余詠珊的引薦下，去年成為無綫親生女，旋即擔任女主角，更連拍三套劇集。不過，處女作《心路GPS》在本周一（18日）首播，收視平均只有23點，出師不利。網友更一面倒大彈她演技幼嫩，不過她一於懶理：「我預咗俾人插！」
雖然「空降」成為女主角，但黃翠如的生活並無富貴起來，冇車冇樓之餘，周一（18日），本刊拍得她行街齋睇唔買，名副其實慳妹一名。
早年曾任職有線高層的余詠珊，去年加入無綫後，隨即引薦昔日有線藝人過檔無綫，如欽點洪永城往中東拍《走過烽火大地》和擔正新劇《單戀雙城》男主角；而另一愛將黃翠如一簽無綫，更火速成為《心路GPS》女主角，與陳展鵬、李司棋合作。
今年32歲的黃翠如，雖然否認屬余詠珊愛將，但就承認獲余介紹而認識曾勵珍，她說：「佢（珍姐）當日就應承會俾個多過一句對白嘅角色我做。」但問到一入無綫即做女主角，她面有難色說：「我預咗俾人插！」
20集的《心路GPS》劇名難明，而且頭段着重講飾演助理編導的黃翠如與飾演編導陳展鵬返內地拍真人騷的過程，節奏緩慢，難怪收視不濟。而上個時段的《戀愛季節》，平均收視一樣只有23點，認真累鬥累。
網友負評
不少網友狂插黃翠如演技麻麻，更暗寸她太快擔正。
我要谷你上一線！（設計對白）
無綫非戲劇科製作總監余詠珊，近年不時提攜有線藝人過檔無綫。對於硬捧黃翠如一事，余詠珊拒認，並推說是珍姐想簽，解釋牽強！
搶贏楊思琦
知情人士說：「當日係余詠珊帶Priscilla（黃翠如洋名）見樂易玲。簽約後，余詠珊又帶Priscilla見珍姐（戲劇製作總監曾勵珍）。珍姐好識做，將Priscilla向監製狂sell。呢套劇珍姐俾咗幾個花旦讓監製李艷芳揀，有新亦有舊，但監製最終揀咗Priscilla。除咗貪佢fresh外，仲有背後有高層睇住，唔得罪得。」
《心》劇於去年七月開拍，當時有檔期可接此劇的花旦還有楊思琦和楊怡，但黃翠如最終爭贏做女主角。而且有傳角色是為黃度身訂做，可見高層力撐的影響力。黃翠如加入無綫不足一年，已連拍四齣電視劇，除播映中的《心路GPS》外，還有《師父，明白了！》及《寒山潛龍》，還有一套新劇與郭晉安合作，存貨多過視后胡杏兒及楊怡。
2月17日扮cute冧監製
周日（17日），黃翠如於將軍澳宣傳完《心》劇，便與監製李艷芳齊齊坐港鐵走。其間記者發現黃不時扮鬼臉，𠱁得身旁的監製相當開心。
排隊等搭車
黃翠如乘港鐵到鑽石山落車，之後她便行到附近巴士站，坐在路邊與街坊齊齊等車。
逼坐邨巴
最後黃翠如與不少外籍女傭坐邨巴返回馬鞍山聽濤雅苑。據知現時她與家人同住一個市值400多萬的六百呎單位。
出道十年
32歲的黃翠如（Priscilla），出身小康之家，畢業於浸會大學傳理系。03年她加入有線，成為娛樂台主持，因她經常被安排訪問周星馳，故有「周星馳御用主持」稱號。於有線期間，她曾與蘇民峰拍攝《40日峰狂嘆世界》及《活得很滋味》，08年更被徐小明力捧擔任電影《奪標》的女主角，所有危險動作棄用替身，非常落力。10年，她過檔now擔任主持，不過11年又回歸有線，直至去年才加入無綫。
監製：有其他花旦揀
去年10月拍完《心》劇，黃翠如便立即被委派拍《師父，明白了！》，擔正做女一，與黃浩然做情侶。5月，她再拍《寒山潛龍》與馬國明黃浩然搞三角戀，備受重用。
周日（17日）黃翠如宣傳《心》劇，對於有高層力捧，她說：「外界將我派別化，係會令人記得我，當日我見工時係見樂小姐嘅。預咗俾人插，我唔後生，會努力及接受批評。」監製李艷芬則說：「揀角時係有其他花旦揀，不過我愛用新人拍劇，每個演員都有第一次。（之前係咪想用楊思琦？）唔好執着呢個point！至於角色方面，個個都係度身訂做。」
記者致電余詠珊，她說：「我啱啱喺外地返嚟，冇睇過套劇，唔知收視，好差咩？（係你捧佢做女主角？）唔係，係珍姐喺電視見到佢，想簽啫！（唔係你引薦咩？）我本來想自己用，但珍姐想簽就俾佢過戲劇組。（係咪叫監製用佢？）冇咁嘅事！」
生活平民化
即使有高層撐腰，但黃翠如未有未紅先驕。宣傳當日，記者發現她在後台與其他演員有講有笑，連李司棋也說：「我好喜歡佢，佢好乖，拍劇時唔會淨係掛住補粉，我都想幫佢。」
高層前輩輪住撐，但《心》劇出師不利，首集平均收視只有23點，甚至不及用來攝期的《初五啟市錄》（《初》劇首周平均收視25點）。
外表清純的黃翠如，今年已經32歲，比起其他無綫花旦，的確遲起步。她現時劇酬只得七千蚊一集，比其他花旦差一大截。她過檔無綫，無非想博一鋪，可惜《心》劇播出後反應不佳，大部分網友也插她演技麻麻。其實黃翠如平日生活極平民化，不愛打扮的她，食住慳唔在講，不用開工的日子，素顏的她衣着沉實，完全零星味。看來呢條花旦路認真唔易行。
2月18日
慳妹大作戰
32歲的黃翠如甚少廣告和商場騷，實質收入不多，難怪本刊拍得她周一（18日）行街時，全程齋睇唔買，只使了70多元，相當慳儉。
使$3.9
素顏的黃翠如由寓所先坐邨巴到大學站，再坐港鐵於沙田站下車，其間她不時於車廂內煲電話粥。當日她以八達通乘車，車費僅$3.9。
慳$1,199
她第一站便到「Joyce Beauty」睇中一支$700的精華素，但最後冇買。之後她再到時裝店揀選$499兩件的冬季特價衫，但最後她連試都冇試就走人。
慳$1,200
黃翠如再到日牌「PORTER」揀選$1,200手提電腦袋，但拎上手試過幾次後，黃又放棄。
使$72.9
黃翠如行足三個鐘終於見餓，於是她就到壽司店，點選一個$69連加一的特價午餐。之後她坐港鐵轉邨巴回家，全日共使$72.9，慳得好緊要。
有線主播有出路
黃翠如是有線主播出身，入行十年才加入無綫做花旦。其實有線不少女主播離開有線後都有不同出路，大部分更搵到好歸宿。
陳貝兒
陳貝兒有「有線一姐」的稱號，是有線娛樂台首代主播。09年她離開有線向外發展，曾擔任BMA唱片公司的高層。前年她與圈外男友黃國棟結婚，現過着少奶奶生活。
余思敏
余思敏擔任有線娛樂台主播時認識鄭中基。前年七月余思敏為鄭中基誕下女兒，二人去年結婚。余思敏婚後專心湊女，甚少公開露面。《蘋果日報》圖片
劉明軒
美國南加州大學財務系畢業的劉明軒，05年入行，09年時被選為「我最喜愛的主播」，今年1月下嫁李彩華前男友王傲山。
梁嘉琪
03年加入有線的梁嘉琪，比起黃翠如更早過檔無綫。08年加入無綫的她，一劇接一劇，不過所演的角色以配角居多，唯獨去年《回到三國》，可以令她一嘗第二女主角滋味，拍住林峯演戲。
