老婆Lisa S.有咗六個月，吳彥祖放假陪產前，先還片債。早排佢喺深水埗南昌街天橋埋位拍《魔警》，場戲要吳彥祖開槍再向後撻落車。
動作唔算複雜，加上見面口，要自己嚟；撻落車嗰吓由於要快同準，所以要用威吔拉。拍到第三take，吳彥祖人撻落車，隻手㩒到擋風玻璃碎，當堂流血。
雖然掛彩，但導演仲想嚟多take，吳彥祖又再撻多次。即係咁，百幾磅拉後撻落車，嗰度力一定唔細，吳彥祖唔用替身自己硬食，都算唔話得，俾着其他錫身嘅，睬你都傻！
威也連住吳彥祖身上件防彈背心，一開槍，天橋下嘅吊臂工作人員同步將佢拖後。
撻落車一下，吳彥祖用雙手卸力，搞到俾擋風玻璃碎𠝹到。左手尾指同無名指之間受傷，吳彥祖用紙巾攝住止血。
