做咗單親媽媽，楊思琦養家、供樓、湊女獨力承擔，但形象差工作有限收入少，壓力爆煲下經常情緒失控，試過因為囡囡楊卓穎被傳媒拍到容貌而報警。
上週日（二月三日），楊思琦帶住囡囡與母親三代同堂，到將軍澳新都城掃貨過年，一如以往，中下價貨為目標；行足兩個鐘，囡囡Krystal一直坐在拉下太陽擋的BB車內，不見天日。
見腳唔見樣
楊思琦背李泳豪偷食吳帥到未婚產女，大話港姐排頭至今搣唔甩。昔日的服裝贊助冇晒，新年要開工見人，焗住出血置新裝。上週日下午六時，在母親陪同下，楊思琦帶埋囡囡到將軍澳新都城商場shopping。在平民商場戴住巨型黑超，楊思琦顯得分外顯眼，更誇張是在室內地方，囡囡Krystal坐住的BB車，太陽擋仍長期拉下，小Krystal全程只露出一對腳仔，做足戒備，保護愛女容貌。
戴住黑超的楊思琦，响商場行街，BB車都要落太陽擋，唔想囡囡容貌隨便曝光。在七彩「bar海」睇足半個鐘的楊思琦，最後忍手離場。
懷疑有傳媒影相，楊思琦搵柱位單擋B女，再搵媽媽四出視察。
外婆把風
一向慳家的楊思琦，如今一闊三大，更加要量入為出。行完首飾店再睇女裝內衣，在七彩繽紛的「bra海」中，楊思琦逐一拎上手細心研究，但最後還是忍手離開。
試過因為囡囡被攝入鏡頭，搞到報警的楊思琦，是日警覺性未有半點減低，只要有陌生人走近，兩母女即大為緊張，先將囡囡推開一旁，再由婆婆做探子，監視陌生人舉動，如臨大敵。
行了成個鐘都無收穫，楊思琦轉場到價錢大眾化，還在做大減價的Giordano尋寶。其間楊思琦懷疑有傳媒，於是九秒九推着囡囡離開，在附近搵到一條大柱位做遮擋，思琦媽亦有默契地緊隨離開，睇清附近環境後，再向女兒點頭示意OK，楊思琦才放心，拉開BB車的太陽擋，看看坐在密封BB車內個多小時的Krystal情況如何。
同吳帥一個餅印的小Krystal眼仔碌碌，相當乖巧，只是身形偏瘦，頭髮亦較疏。放下警覺性的楊思琦，暫將囡囡交母親看管，自己折返Giordano再拼，主攻二百元以下、買1送1的保暖內衣，接近九時才捨得離開。
去年四月生完女的楊思琦，急住復出搵奶粉錢，拋胸露肉，四日三夜返內地拍節目，都只係得六千蚊落袋。囡囡同吳帥一個餅印，女生男相。
楊思琦對囡囡私下見報格外緊張，去年十月在銅鑼灣皇室堡發現有記者，即時𤷪𤺧怒睥。
忌提吳帥
過去一年，頻頻有龍B出世，除了習慣收埋家人的劉華，未有公開愛女劉向蕙B相外，其餘的圈中父母，都願意大方分享，楊思琦雖未至於劉華般落閘，但對小Krystal亦相當保護，某程度同囡囡似足拋妻棄女的吳帥有關。
「搞到咁嘅田地，思琦到而家都放唔低，個女跟佢姓楊，都係唔想啲人成日提住個男人，放唔低，就只可以逃避。」楊思琦的身邊人透露。
終日將囡囡收埋唔見人，對小Krystal絕非好事，楊思琦亦承認，近日開始返playgroup的囡囡經常扭計。「個女可能响屋企習慣對住媽咪同婆婆，見到其他小朋友，就會喊住搵我。」
首飾唔算必需品，楊思琦齋睇無入貨。轉過身又同思琦媽研究買1送1的保暖內衣，兩母女逐款格價，精打細算。
開支一闊三大，楊思琦掃貨，離不開二百元樓下做緊大減價的襪褲。揀錯空心老倌吳帥，楊思琦去年二月生完囡囡楊卓穎，隨即斬纜，各走各路。
去年尾楊思琦應邀與囡囡一齊影月曆，為香港思覺失調學會籌款才母女檔亮相。
月入三萬唔夠供樓
單親媽媽形象唔夠健康，楊思琦生B，唔似其他星爸星媽有贊助商大量供應免費奶粉尿片，開支大，但即使她騷價一減再減，工作量依然少之又少，平均月入得三萬，隨時連每月供樓開支都唔夠俾。
12年11月 信德中心《夢幻天鵝湖舞會》 $4萬
《瘋狂歷史補習社》錄影 $3千一集×23集=6萬9千
8月 無綫節目《迎海尋珍奪寶》 $3千
6月 《五覺大戰世界巡迴》演出 $3千
5月 美容中心開幕禮 $3萬
無綫節目《開心熱浪合家歡》 $3千
4月 大埔超級城「優悠貓唱遊歐陸音樂城」開幕禮 $4萬
深圳金至尊大酒店登台 $6萬
共賺：24萬8千
