無綫蛇年學人搞春晚，call齊全台藝員參與《TVB新春黃金慶典》，司儀陣容繼續係曾志偉汪明荃加Do姐。話晒係大騷，諗住鐵三角實冇甩轆，點知阿姐同Do姐輪住發台瘟，將蛇年講咗龍年，直播講錯轉播，好在個節目真係錄播，仲有機會NG再嚟過。兩位阿姐狂NG，曾志偉當堂面燶燶。
有份做春晚嘉賓嘅阿倫，是日客串歡樂大使，同呆坐等睇騷嘅現場觀眾打招呼，又自動波唱咗首《在水中央》娛樂觀眾。
成晚NG冇停過，唔使背司儀稿嘅阿倫，又嚟搞事，埋位前叫曾志偉背熟啲稿，小心講錯嘢要坐監，仲爆粗話：「到時陰溝裡翻船，咁就陰溝功！」嘩，新正頭，校長講嘢都係小心啲好！
NG又NG，講錯稿要再錄，台詞講得唔順又話要錄過，曾志偉個樣想扯火，阿倫就响度講粗口爛gag緩和氣氛。
卿卿獻唱首本名曲《擋不住的風情》，阿倫又嚟多口，叫人俾條毛卿卿。
可以上春晚嘅歌手有限數，鐵腳有草蜢同容祖兒，好在有個周慧敏，叫做有新意！
