女神周秀娜（Chrissie）與男友陳偉成（Avis）拍拖6年，最近多次傳出因為Chrissie經常北上搵人仔睇唔實Avis，令Avis有機可乘，背女友偷食。
週日（20日）暴瘦Chrissie出席《十大中文金曲頒獎禮》忽然自爆回復單身。據了解，Chrissie係喺上週六（19日）先正式同Avis分手。霎時失去依靠，Chrissie只好緊抱內地劇拍檔方力申這位大水泡，辣㷫Stephy都在所不計。
週日（20日）晚，Chrissie出席《港台十大中文金曲頒獎禮》時，忽然於台上開咪宣布甩拖：「唔好意思我喺度想講我回復單身，心情ok，大家可以熱烈追求我。」講就講到好輕鬆，背後其實有苦自己知。
受感情困擾，最近Chrissie暴瘦。上週六（19日）出席香港基金慈善晚會時，以一襲迫爆晚裝示人，雖則上圍谷到好偉大，但手腳同面已瘦到見骨，慘變人乾。
上年肥嘟嘟
上年8月，Chrissie出席生力啤活動時，着住運動背心大騷fit爆身形，當時塊面仲包包哋勁吸引。《蘋果日報》圖片
背脊見骨
轉過身，露大背嘅Chrissie，唔只頸椎見骨，連雞翼位都凸到㓤親人咁。
「諗法唔同咪分開」
週日喺《十大金曲》騷中，Chrissie高調表示自己回復單身，令全場嘩然。
Chrissie上星期六出席活動時已承認同Avis冇見面超過1個月，「近排少溝通，但現階段仲係男女朋友關係。」據知情者透露自從上個月Chrissie同Avis醞釀分手，Chrissie一直都好唔開心，「因為女尊男卑，Chrissie愈紅，佢同Avis就愈多拗撬。同Avis醞釀分手期間，Chrissie經常食唔落嘢，搞到成個人落晒形，瘦到見骨，戥佢辛苦。」
週日（20日）晚，本刊記者亦於《十大金曲頒獎禮》後台直問Chrissie失戀心情，佢扮輕鬆話：「冇話可唔可惜，人大咗發覺拍拖唔只要問心，仲要有共同目標，大家諗法唔同咪分開囉。好多問題唔係一朝一夕，係不停積落嚟。」問到近期暴瘦，Chrissie繼續死撐：「冇，我冇磅過，但我知自己只係firm咗，冇輕到。」
拍劇撻着小方
Chrissie自爆分手後，週一即有報道指她原來暗中偷食，搭上上年合作拍劇的方力申，硬撬Stephy牆腳。之不過據知情者透露，Chrissie跟方力申的而且確傾得埋，但Chrissie只當小方係水泡，冇諗過同對方拍拖。
本週一，記者亦致電Chrissie及Avis的經理人Roy了解，佢證實Chrissie係喺上週六晚出席活動後，先至同Avis攤牌，6年情正式玩完。但Roy否認Chrissie搭上方力申，「絕對唔關方力申事。可能因為佢哋套內地劇（《唐朝浪漫英雄》）就嚟上，先俾人借啲意煲新聞。」至於Chrissie跟Avis的真正分手原因，Roy就話唔方便透露。而本刊亦曾多次聯絡Avis，但至截稿時仍未回覆。
回味咀小方
2人上年合作拍咗一套內地電影及一套內地劇。喺即將播映嘅《唐朝浪漫英雄》內，2人更有咀戲。上星期2人出席新劇發布會時，劇中要扮「孖膶腸」的娜姐更話：「自己唔係第一次拍接吻戲，但呢場另類接吻戲令我非常難忘、亦非常回味。」
雖然小方傳出同Chrissie撻着，但上年年尾小方同女友Stephy於深圳電台舉行嘅跨年晚會「聲振新世界」中，一齊着睡衣登台，依然孭住「情侶檔」個朵搵銀。
方爸爸：唔知邊個周秀娜！（真實對白）
關於方力申同Stephy感情有變一事，週一（21日），方力申爸爸方毓仁向本刊記者話：「冇啲咁嘅事，娛樂新聞一單……唔知邊個周秀娜。」回應時頗勞氣。
表面上Avis衰晒，娜姐好慘。但查實2人拍拖6年來，娜姐都有同其他男人傳緋聞，事實可能係各有各玩。
11年頭，Chrissie同Avis一齊去曼谷度假，就被影到喺泳池旁幫男友推油，親密得嚟又好肉麻，當時仲好恩愛。
Chrissie
嗒里奧
上年8月，有傳Chrissie因不滿Avis同Mia拍戲撻着，於是暗撻英超曼聯嘅里奧費迪南報復，更喺自己微博放上里奧送畀佢嘅cap帽示威。
啜老外
Chrissie最近被影到同一班外籍靚男食飯，更跟眾男又攬又啜。原來當時佢已冇見Avis 1個月。
Avis
上媽模
上年8月上畫嘅《喜愛夜蒲2》中，Avis同媽模Mia（陳靜儀）有大膽親熱戲，據稱2人更拍出真感情，激嬲Chrissie。
陪師妹
前年8月，Avis被影到陪住契妹袁聖殷行街shopping，其間仲黐到鬼咁埋。
上週四Avis已喺微博話冷漠比爭吵更可怕，早已暗示分手。
Chrissie北上掘千萬
女神周秀娜，自上年起轉移基地，北上搵人仔，單係上年已拍過《非狐外傳》、《Hold住愛》等4套大陸電影及一套大陸劇《唐朝浪漫英雄》，加上頻頻接大陸騷。據稱Chrissie上年已賺約1千萬港幣，唔怪得知，搬出娘家嘅西環舊樓，轉租小西灣藍灣半島，升晒呢。
上年就同喺內地紅爆嘅楊冪、以及劉凱威一齊演內地電影《Hold住愛》，拍得一哥一姐做戲，地位有番咁上下。
舊居~今年頭，Chrissie仍然住喺西環舊樓業昌大廈。
新居~今年狂拍大陸片賺人仔後，傳聞佢最近就搬去港島東嘅大型屋苑藍灣半島，月租約2萬。
