繼08年《長江七號》，今年周星馳再有新作賀歲，自編自導做埋監製的《西遊•降魔篇》，安排年廿七（二月七日）上映。按照過往作風，新戲上畫，例必「換畫」！早前在內地宣傳時，周星馳自認是女主角舒淇「男友」，自製緋聞。
有傳名花有主嘅舒淇唔吼星爺，勁請對方食檸檬，但同片仲有另一星女郎周秀娜，身材樣貌唔輸蝕之外，仲要甩拖單身冇包袱。「係又唔錯呀！」周秀娜說。
一人話事
《長江七號》之後，周星馳事隔五年才有新作，與郭子健聯合執導《西遊•降魔篇》。一如過往，由劇本、揀演員到拍攝，都是周星馳一人話事。
試過黃聖依、張雨綺一片拜拜，星爺今次決定唔用新人做「星女郎」，一早預留女主角給他心目中的女神舒淇，再加宅男至愛周秀娜，兩性感女星串Q。
舒淇、娜姐級數同cup數均有別，周星馳知人善用，娜姐搏上位，要少布！舒淇貴為影后，係咁意，露吓膊。
娜姐教舒淇跳舞色誘唐僧，當晚天氣只有十度，娜姐唔使埋位時，包到冚取暖。沒有舞蹈底子，娜姐在低溫下露肉，唯有不停跳，乘機暖身。
娜姐話自己唔識嗲功，星爺親身示範如何跳扭腰舞才有挑引的感覺。同樣視星爺為偶像的羅志祥，戲份不多，不過可以拍偶像嘅戲，已經好開心。
拖手教戲
身為導演，周星馳大條道理落場教戲。有指每逢有舒淇、周秀娜埋位戲份，周導就有早無遲，跟到最尾；還不時拖住手仔教路，十分落心機。
至於男演員包括文章、黃渤及羅志祥，周導無暇照顧，全交給郭子健負責。
有周星馳貼身跟場，初次做「星女郎」的周秀娜坦言知道對方搵自己拍戲，開心到彈起，因為無法置信，重複多次要經理人問清楚。
「星爺係我由細到大嘅偶像，我好鍾意佢，喺橫店拍嘢個陣，佢日日都教我哋做戲，好搞笑。（同佢拍戲嘅星女郎多數會變成緋聞女友）係又唔錯呀！不過幾時輪到我吖！係都女主角（舒淇）先啦！」周秀娜說。
舒淇中伏，胸前流血受傷，唐僧用手指篤胸療傷，舒淇乘乘機機𠌥低身露罅等嘴，點知唐僧點極唔明。
找來內地紅人文章做男主角，故事講佢五百年前開始修道，曾動過凡心。內地諧星黃渤（中）做醜版孫悟空，星爺同佢傾偈，乘機拖實女神舒淇。
擺明車馬追女，星爺為新片主題曲《一生所愛》寫詞，欽點舒淇主唱，連錄音都跟到實，指點感情位，服侍周到。
女角變女友
周星馳開戲，女主角甚少重複，唯一不變，是每開新戲，都會搭上「星女郎」，幾乎拍一套戲，換一次畫。
朱茵
92年，拍《逃學威龍2》與朱茵撻着，有指朱茵是介入周星馳與羅慧娟感情的第三者。08年，朱茵在《志雲飯局》訪問中暗指當年拍攝《西遊記》時到酒店房找男友，捉姦在床而分手。
莫文蔚!95年，周星馳與莫文蔚合作拍攝《西遊記》後和朱茵分手，98年莫文蔚開演唱會，星爺帶同母親撐場，女方更即席以一曲《情與義》送給當時已分手的前度。
趙薇!00年，周星馳與趙薇拍攝《少林足球》被拍得在珠海街頭，繑着手齊返酒店，態度親暱
張雨綺~05年，新人張雨綺被星爺睇中參演《長江七號》成為「星女郎」，有指星爺對她寵愛有加，安排對方與自己齊齊拍芬達廣告，二人更被拍得在廣州賓館密會。
