時裝生意愈搞愈大嘅徐濠縈，最近宣布第三間分店正式開幕。新店位於銅鑼灣，仲係貴租地鋪，真係唔講得笑。早排因為飯局事件，未有日日更新微博講衫褲鞋襪嘅阿徐，最近為咗谷生意，响微博同Facebook落重料，影鋪影衫影自己外，仲call齊明星朋友幫手轉發，真係慳唔少廣告費。
上個禮拜四（十七日），徐老闆更親自巡新鋪，再企出門口叫同事幫佢影相，放上社交網頁分享自己著緊乜嘢牌子。聽講佢老公打算嚟緊放半年假，到時叫Eason坐响鋪招呼客人，擺隻招財歌神响度，保證客似雲來。企街影相，邊使咁辛苦呀！
企出街叫同事揸機影相，影衫影鞋都係其次，阿徐無非想影埋門口招牌，放相上微博做宣傳。
返入鋪頭，除低太陽眼鏡，睇清楚新鋪陳設有冇唔妥當。
