香港冇雪落，一班名媛、阿太最鍾意趁住冬天飛往外地滑雪shopping，近近哋飛去韓國、日本，無jet lag嘢食又啱嘴型，加拿大的Whistler雪山夠宏偉壯觀，但估唔到連中國的哈爾濱都吸引到闊太垂青。
楊如芯再做初哥
楊如芯（Sean）和趙式芝（Gigi）每逢聖誕和農曆年都去北海道的二世古滑雪，她們玩的都是snowboard，「我哋已經玩到最高（black lane），阿Gi仲諗住開始學玩花式，新年會過去換過塊soft啲嘅板。」除了玩snowboard，Sean去年聖誕亦搵教練學ski再做學生，「阿Gi好鍾意滑雪，佢玩得好勁，我五、六年前開始跟佢玩snowboard，但我又想玩番ski，其實細個喺美國都學過，但唔記得晒，所以學番，費事好醜樣。」回到香港，她就去觀塘的室內滑雪場「補鐘」，「嗰度都有層半樓高，噴住水嘅地氈斜坡不停滾動，學一個鐘就等如喺滑雪場ski咗四個鐘。」
Sean笑言趙式芝玩足兩個圈，她才滑到一圈。Gigi每日負責清理車身積雪，就連玻璃上的冰都要剷到乾乾淨淨。
楊如芯每次由室內步出戶外，眼鏡即刻矇查查。
朋友送給阿Gi（右）疤面佬擋風scarf，加埋眼罩，真係冇人認得佢。趙式芝（黃衫）繼續玩snowboard，Sean就開始學番ski。
她們喜歡去日本餐廳「阿武茶」，「佢哋嘅和牛、串燒都好正。」
自駕遊
她們揀在日本滑雪，貪有得玩食得好，「我哋會預早plan定，book枱搵啲特別地方食嘢。」這兩年她們更租車四圍去，「二世古有好多slopes，有啲slope四點就閂，揸車會方便啲，每次都係我負責揸車。」不過這個司機卻冇乜耐性，「北海道好大雪，架車泊喺外面一晚已經俾雪冚住，第二朝要剷開晒啲雪先開到車。」雪未剷完，Sean就忍唔住要開車出發，「就算剷走咗啲雪，停低架車一陣又會冚晒雪，開車有熱力雪就自然會融啦！」Gigi忍唔住話：「但玻璃上面已經結咗冰，都未剷走晒，佢就話睇到路可以開車。」Sean聞言即反駁：「喺我個位睇到㗎！」
北海道
Qinnie愛追求刺激玩速度，但老公鄭躬明比較錫身，二人雖玩black lane，但都戴上頭盔及護膝，「我唔係怕自己跌，係怕人哋支pole打到個頭。」
北海道的二世古（Niseko），以幼細粉雪及風景優美聞名。其中有四個主要滑雪場：格蘭比羅夫、二世古山莊及Annipuri，當中以比羅夫最受歡迎。
陳君宜東京買狗
愛吃日本菜的網上時裝店zeuz.com老闆娘陳君宜（Qinnie），近年只揀日本二世古滑雪，全因愛上當地聞名已久的粉雪，而且近近哋絕無jet lag。今個元旦，陳君宜跟老公鄭躬明約埋農圃飯店老闆夫婦及詩琳美容老闆娘三pair人，先去北海道公認最好的比羅夫（Hirafu）滑雪場，再殺入東京逛街血拼，「這個場附近最多餐廳，又有幾間鋪賣滑雪gear，好方便。」
陳君宜每次滑雪之餘，總預留幾日在東京hea，「行街未必要買衫，齋睇新嘢都係一種樂趣。」她指的新嘢，包括到寵物店睇狗，今次她更無心插柳下為家中的Poodle家族添上新成員，「這隻貴婦女好嗲好黐我，狗價三萬港幣，初時老公嫌貴，但佢本身都愛狗，最後心軟囉；另外兩對朋友都被我哋感染，一人買一隻。」陳君宜還即時上網搵方法，最後找到香港有公司包辦運狗、文件申請等一條龍服務，三隻狗收費兩萬多元，等約三星期便運到府上。「老公想叫牠做旺財，點得㗎？人哋係㗎妹，我改名叫富子，英文名Tomiko。」
家中已有兩女一男貴婦狗，今次與東洋貴婦狗一見鍾情，Qinnie將牠改名富子。友人將富子的家姐及另一白色貴婦狗買回港。
陳君宜每次去東京，必到銀座Ukaitei食鐵板燒，鮑魚和牛set是她至愛，每位一萬九千円。鐵板鵝肝是前菜之一。
這次北海道滑雪之旅，他們與詩琳美容老闆夫婦（左一、二）、農圃餐廳老闆（左二、三）同行。
哈爾濱
在雪地負責拉客人跑圈的小狗，一直留在室外，Helen看見心痛，跟狗狗來個溫暖擁抱。
距哈爾濱約三小時車程的亞布力滑雪場是哈爾濱最大的滑雪場，建於1980年，曾舉辦兩屆全國冬運會及一次亞洲冬運會，是中國數一數二的標準滑雪場地。
榮雪梅試新場
榮雪梅（Helen）每年都去不同地方滑雪當試場，「順便睇吓風土人情，去過瑞士、加拿大、日本、美國，意大利等地滑雪。」她最喜歡瑞士和意大利的滑雪場，「雪場不僅美，仲有好多好食嘅餐廳，又有俊男美女來滑雪。」
上月尾，Helen便和兒子去了哈爾濱的亞布力滑雪場，下榻當地的Club Med度假村。哈爾濱溫度只有零下三十多度，他們會將平時用的body cream混合橄欖油一起用，「咁溝埋用會更滋潤，所以我哋啲皮膚無乾到。」Helen和兒子都是黑道（black lane）高手，但滑到下面普通道時已太多人，地面早已結冰，速度太快很難停住，所以跌倒，「滑雪板打到胸口和腳趾，腳趾瘀了。」
他們除了滑雪，亦選了一天行雪山，「行雪山一定要有嚮導，大雪下，好多地方深不見底，跌咗落去好危險。」在當地，他們最愛打邊爐，「滑了一日，特別能吃，可以放開咁食，完全無肥到。」她更喜歡來個蒸氣浴，「滑完雪要warm up body，否則好易感冒。」不過Helen說哈爾濱場地不太好，「太凍，好少雪，冰好多，好危險。」所以平時滑足一天的她，在當地滑大半天便算，「佢哋嘅滑雪用具唔勤更換，外國滑雪場比較安全。」
滑完雪，Helen與兒子來一個熱騰騰的火鍋。他們參加酒店的除夕派對迎接2013年。
酒店還在住客的房子外做了一排雪人。她著齊禦寒衣物，開始向雪山出發行雪山。
韓國
詩詩一向不愛食零食，當妹妹提議零下十八度下，排隊買紫菜魚蛋時，詩詩本來耍手擰頭，「圓圓話廿幾人排隊一定好好味，結果好食到我想再排。」
距離首爾約三小時車程的江原道平昌Alpensia滑雪度假村，是韓國近年發展的大型滑雪勝地，開業三年多的Alpensia建有卅一條滑雪道、十五條登山纜車線、及長約五公里的彩虹滑雪道，更是2018年冬季奧運會滑雪項目主場地。
汪詩詩教仔滑雪
甄子丹太太汪詩詩聖誕和家人去韓國滑雪，話晒韓劇大熱，她又未去過，自然想去睇吓。「個女識唱Psy嘅歌，當地司機也讚她唱得好，人哋以為係韓國細路女唱歌。」一星期的旅程，有三日留在首爾，四日去滑雪。滑雪時剛巧落雪，詩詩便提議：「啲雪好soft，叫囝囝伸條脷舔啲雪，佢即刻趴喺地上，我即叫停佢，我話唔係叫佢舔地下。」
在加拿大長大的詩詩，慣了滑雪，但話晒兒子首次滑雪，詩詩安排了教練給五歲兒子，不過囝囝見到教練姐姐即時撒嬌不願郁，詩詩即時嚴厲叫兒子起身，「我拎相機錄低佢哋，又要跟住個仔喺佢前面擋住佢，所以我學曉backward skiiing。」詩詩亦為女兒的技術感到驕傲，「有個朋友跌倒，我個女中途停到去扶佢，我反而停唔到下來，我要再練吓，否則驚跟唔到個女。」
詩詩一對仔女拿着做雪人的器具，開心地跳起來影相。圓圓拎住杯巨啤扮嘢影相，「係倒出來分細細杯大家飲。」
加拿大
冰天雪地，Mira最愛歎杯熱辣辣的白朱古力。
離溫哥華以北約125公里的Whistler滑雪場，是北美最大規模的滑雪勝地，由於降雪量穩定、天然山脈的規模和地形變化，適合多項滑雪活動，2010年更為冬季奧運會滑雪項目比賽場地。
葉梁美蘭屢撞屢戰
前行會成員葉維義太太葉梁美蘭（Mira），剛過去的聖誕便和丈夫、女兒及丈夫的朋友一齊去了加拿大的Whistler滑雪度聖誕，「嗰度棵棵都係聖誕樹，聖誕氣氛濃，一家人去好溫馨。」近六年他們一家人都去Whistler過節，「以前冰多，現在雪多，女兒又可以在波士頓飛過去。」
Mira丈夫喜歡在mountain guide帶領下，坐直升機去人迹罕至的雪山滑雪，來個heli ski。「老公玩black diamond也唔夠喉，佢喜歡創造fresh tracks。」愛靚的Mira則喜歡玩snowboard，「啲衫型啲，boots又型啲。」他們每次都有教練一對一陪着，「我傷過咁多，有咩事教練執都執到我返去。」不過Mira也因滑雪受過傷，「有個人直衝落嚟，好似打保齡衝落我度，我凌空飛起撞到右肩脫臼及骨裂。」她又試過滑雪時，前面有人突然停低撞埋一堆，「上次撞了右肩，今次用左肩撞過去，韌帶斷咗，做了手術，幸好上次身體檢查，醫生都話：『睇唔出我撞過。』」
Mira連滑雪都貪靚，衣服、snowboard顏色襯到絕。
滑雪場內掛滿christmas wreath。Mira喜歡到Bearfoot Inn食飯，最鍾意白松露鹿肉。
