三個女人一個墟，殊不知三個男人坐埋一堆，情況一樣唔弱。
呢排忙緊同謝霆鋒拍新戲《特種救援英雄》嘅余文樂，難得唔使開工，老友記周柏豪又開完演唱會，於是約出嚟見面飲茶吹水。
地點揀上環普慶坊，貪嗰度人少少又易泊車，余文樂同一位男性朋友先到埗，冇幾耐周柏豪揸車自到。全男班，雖然《壹》仔冇千里耳，但就見到佢哋攞住iPhone睇車相，由周柏豪提供圖片，三個男人細聲講，大聲笑。
由下午四點幾開始吹，吹到太陽落山都唔願走，之後再嚟多個朋友，四個男人，愈笑愈大聲，之後周柏豪响Instagram搵到張女仔相，再同三男齊齊研究。男人吹水，離唔開車同女，正常，如果佢哋坐响度講音樂講電影講理想，八珍仲驚。
再有朋友加入，周柏豪開咗張靚車相，先俾余文樂過目，再俾其他兩個朋友傳閱。
中場休息，余文樂同朋友企出餐廳扯煙。
愈夜愈精彩，周柏豪分享完車相，仲有女仔相睇。六點幾，余文樂愈坐愈凍，要笠番頂衞衣帽，佢做老細埋單，之後同朋友食多支煙先走人。
