「SINA MUSIC樂壇民意指數頒獎禮2012」前晚在九展舉行，合共頒發63個獎項，容祖兒和陳奕迅成為大贏家，各奪得4.5個獎。以魚網黑絲微露事業線登場的祖兒，揚言要苦練心形嘴，以免再在台上O嘴示人。
【今日我至衰】容祖兒成日失言，見到王菀之攞獎就整個O嘴出嚟，搞出個大頭佛，佢前晚都知衰，自己攞獎都刻意O嘴。
容祖兒、陳奕迅（Eason）、林峯、鄧紫棋（G.E.M.）等前晚到九展出席「SINA MUSIC樂壇民意指數頒獎禮2012」，祖兒和Eason各奪4.5個獎成大贏家。早前王菀之在《勁歌》頒獎禮上得金曲金獎時，祖兒露出O嘴驚訝表情，口型似向G.E.M.呻：「我諗我哋冇一個人會諗到佢會攞到金。」祖兒前晚攞獎時，蔡卓妍抵死叫她不要O嘴。
祖兒笑指當晚不知為何會O嘴，亦忘記向G.E.M.說甚麼，她說：「佢（指王菀之）都冇諗過佢攞，我絕對唔係唔抵得，佢攞絕對戥佢開心，就算係都唔會係我首歌攞。」記者指網上流傳港台頒獎禮賽果會由關心妍得最優秀流行女歌手大獎，並叮囑祖兒屆時切勿O嘴，她笑言會苦練心形嘴，盡量不會擘大口，更自嘲本性不會事先計劃：「如果唔係都唔會衰咁多次，我瞞唔到，我光明正大，只要問心無愧，做好本份。」G.E.M.亦為祖兒澄清，指當日之言應是「我諗王菀之冇諗過攞金」，並覺得完全沒貶意。
每逢上台表演，陳奕迅例必興奮，毫不介意大晒腩肉，G.E.M.最近是非不絕，連開個唱都被炮轟門票索價太高
Eason自嘲軟膠草
Eason對於頒獎禮是非不斷，他認為現時做甚麼都會被人抨擊，記者指他得獎沒人會抨擊時，他笑說：「開心你哋咁講，但我唔會做特首，抨抨吓就慣，唔會唔敢攞獎。」對於取消亞太區獎項，Eason說：「留番畀TVB音統處理，我冇意見，我係一條好長軟膠做，跟住個頭好倔嘅草，我係一條軟膠草，冇乜攻擊性。」
此外，G.E.M.個唱票價高達1,280元，就連早前批評她沒禮貌的甄妮也不及她貴，G.E.M.驚青說：「唔講呢個話題，好驚，上次TVB自嘲吓都有啲驚，總之遇到前輩歌手都會請。」
From:
http://hk.apple.nextmedia.com/entertainment/art/20130118/18138000
