熊黛林父親熊仁權日前不幸病逝，天王郭富城拋開偶像包袱，以未來女婿身份送至親最後一程，企定定任影唔嬲，嗰份勇氣同對愛情嘅執着，實在值得表揚。同幾年前劉德華秘密赴大馬祭外父，又用人牆，又出動傘陣，大方程度差好遠。不過早喺幾年前，都有一位天王級歌手，亦都係因為一場喪禮，而公開隱藏多年嘅家人身份。
講緊嘅就係校長譚詠麟嘞。06年3月，阿倫父親譚江柏喺養和醫院病逝，享年九十五歲，阿倫話老父走得好安詳，了無牽掛，但其實最大心願就係公開佢同譚曉風兩爺孫嘅關係，因為阿倫係獨仔，譚伯對呢粒孫錫到燶，一直都想將呢段關係公開。
一向侍父至孝嘅阿倫，終於鼓氣勇氣，選擇喺大氣電波度公開承認有妻子莎莉、「知己」Wendy同埋兒子譚曉風，而父親舉殯當日，莎莉、Wendy同曉風都有出席。
From:
http://hk.apple.nextmedia.com/entertainment/art/20130112/18131197
