王家衛新作《一代宗師》終於出籠，章子怡與韓星宋慧喬「雙旦」之爭成焦點，屢傳「頂唔順」王家衛慢工出細貨的喬妹，戲份慘刪剩六分鐘，與由頭帶到落尾的子怡相比，輸成條街！淪為過場「大茄」的喬妹，內地巡迴宣傳冇影。劇組2月拉隊到柏林電影節造勢，名單上沒有她份，喬妹繼續以拍劇為由玩失蹤。
宋慧喬與梁朝偉飾演夫婦，喬妹戲份只被剪剩6分鐘。
花上長達十年時間製作的《一代宗師》前日於內地上映，於拍攝期間，肯博肯捱，願意犧牲搵銀機會交出檔期的章子怡與男主角梁朝偉由頭帶到落尾，反觀另一女角韓星宋慧喬，2010年曾被傳「扭計」不願花時間補戲，其戲份在片中少之又少，最終只得６分鐘戲見人，與全片130分鐘內佔了100分鐘戲的子怡相比，可謂輸足一條街！
唔交檔期續隱形
電影近月於內地、香港搞首映做宣傳，喬妹則以拍攝韓劇《那年冬天，風在吹》為由，全部缺席no show！劇組昨到台灣稍後到廣州宣傳，喬妹依然冇影，之後劇組將於２月７日拉大隊出席柏林電影節，為獲選為今年柏林電影節開幕電影的《一》片造勢，據知，直至現在喬妹仍未肯交出檔期，她很大可能繼續以拍劇為由「唔到」，國際電影節都拒絕現身，繼續「隱形」！
章子怡拍戲時堅強又捱得，所以由頭帶到尾，戲份最多。
宋慧喬三年前與張震、梁朝偉同亮相招待會，最近以趕劇為由缺席全部活動。（資料圖片）
雖然喬妹戲份少、拒絕宣傳，但男主角梁朝偉前日接受訪問時，仍大讚喬妹與劇組雖有語言阻礙，但她表現專業，都可謂畀足面，偉仔說：「我好明白佢嘅情況，我以前都試過唔識國語去台灣拍侯孝賢嘅戲，當時感覺好似聾啞一樣，不過，宋慧喬表現得好專業，演到大家閨秀嘅感覺，係一個好難得嘅演員。」由於王家衛拍戲作風向來慢工出細貨，未必個個演員明白，問跟導演合作無間的偉仔，有沒有向喬妹做些開解輔導？偉仔笑言：「佢好專業，唔需要我去講。」
佩服章子怡捱得
至於另一女主角章子怡，偉仔亦大讚不已，他說：「我好欣賞子怡，戲唔需要多講，功夫都練得好犀利，我同佢有幾場對打戲，我又唔可以打得細細力，因為要配合好多嘢，一晚拍五十次，打到、踩到一定會有，我知佢有時係好痛，舊患又發作，但佢都堅持住，我好佩服佢，好難得！」
《一》片前日於內地上映，首日票房收人民幣三千萬元，單日已平了當年《2046》在內地的累計票房三千萬，連同昨日之票房，《一》片將是王家衛內地最高票房之電影。
From:
http://orientaldaily.on.cc/cnt/e ...0110/00282_001.html
