G.E.M.（鄧紫棋）早前喺網上拍片寸爆商台，俾大棚圈中人圍插可能預咗，但最估唔到連神級前輩甄妮都忽然踩多兩腳，指大半年前兩人同場時，G.E.M.竟然當佢透明，直斥G.E.M.「冇禮貌」兼「冇家教」，G.E.M.事後在微博補飛兼道歉反被指講大話。
甄妮愈踩愈盡，本刊發現原來G.E.M.不只一次當前輩冇到，如今G.E.M.亦實行懶理指控，拒絕當面同前輩say sorry，而甄妮亦透過助手稱：「佢（甄妮）冇睇過微博喎！」一老一嫩互不相讓。
21歲G.E.M.出道5年，最近忽然被前輩甄妮在一次演唱會宣傳訪問中，勁數她同場不打招呼當透明。
G.E.M.睇完甄妮鬧爆佢嘅報道，即刻寫咗兩次微博，其實內容大致相同，而翌日（5日）出席《慈善星輝仁濟夜》時就大讚甄妮：「由細到大聽佢歌……神級身份，問咗同事聯絡佢，想搵佢做演唱會嘉賓，今次係誤會。」認晒低威。
12年1月
港台當透明~上年1月G.E.M.喺港台頒獎禮後台上，同獲得金針獎嘅甄妮同台只隔謝安琪一個身位，不過就全程擰歪面冇理過佢，反而謝安琪同欣宜就識做同甄妮雞啄唔斷，呢啲咪乖女囉！
第1版
積怨甚深
事發在去年8月《奧運金牌精英大滙演》，雖然G.E.M.即時在微博道歉兼解釋，又自稱早在3年前的個人演唱會中，已想搵甄妮做嘉賓，但事後甄妮在週刊訪問中，又指G.E.M.講大話，甄妮自稱一早已預檔期給G.E.M.做嘉賓，只是最後G.E.M.的公司沒有回覆落實。
一老一嫩看似積怨深，據知原來兩人誤會不只兩次，在去年1月的港台十大中文金曲頒獎禮中，G.E.M.已有機會跟甄妮同場，當時獲得金針獎的甄妮獲大班歌手恭賀兼圍住吹水，唯獨G.E.M.企在甄妮附近（只隔謝安琪一個身位！）竟擰歪面扮睇唔到，神級前輩接連遭妹妹仔當透明，難怪甄妮咁好火。
早前G.E.M.喺YouTube拍咗段4分鐘嘅短片，寸爆商台假民主，引起網民熱烈討論，亦間接引發今次同甄妮嘅風波。
8月大球場冇招呼~到上年8月甄妮再遇G.E.M.，2人出席喺香港大球場搞嘅《奧運金牌精英大滙演》，甄妮話G.E.M.喺後台見到自己冇打招呼，就係咁嬲到𠵱家。
「唔會當面道歉！」
對於兩人恩怨早種，G.E.M.經理人張丹則解釋：「阿G.E.M.嗰次演唱會的確有透過中間人聯絡甄妮，不過後尾個中間人冇再覆我哋，以為甄妮太忙所以冇再跟進，成件事都係傳媒挑撥啫，我哋要講都講晒，亦唔會當面同佢道歉啦！」
而身在美國的甄妮則透過助手回覆說：「甄妮現在喺美國，佢梗係識小巨肺，不過應該冇睇佢微博喎！」其實都係誤會啫，下次見面叫G.E.M.錫番你老人家幾啖咪算囉！
G.E.M.首個紅館演唱會《18 Live 2009演唱會》，原先想搵甄妮做嘉賓，點知最後雙方有誤會搞到做唔成，最後搵咗林海峯、側田頂上。
孖孫楊影相~G.E.M.喺後台冇同甄妮打招呼，不過就同鍾舒漫搵奧運游泳新星孫楊合照，鍾舒漫話：「G.E.M.係有禮貌女仔，我就唔知其他事，不過我有同甄妮、葉蒨文影相留念。」知甄妮讚你有家教啦。
開騷例插當頭起
第一代巨肺甄妮下月18、19、20日開演唱會。最近接受訪問爆出G.E.M.冇禮貌，但原來13年前甄妮當時準備開《一份真演唱會》，當時亦鬧爆一眾歌星，其中更話陳奕迅目中無人、栢芝鵝公喉等，每次開騷前都搵到人鬧，仲要件件當頭起，呢啲經驗後輩真係要學嘢喇！
13年前甄妮喺紅館開騷，仲帶埋愛女Melody一齊上台獻唱，但之前在宣傳演唱會時，當年仍是當紮新人的Eason，都成為甄妮箭靶！《蘋果日報》圖片
甄妮下月18、19、20紅館開3場演唱會，但至週一（7日），仍只得最平$180滿座，睇嚟要鬧多兩個人先谷到飛。
鬧陳奕迅冇禮
陳奕迅
之前已因機上嘈吵一事鬧過Eason，之後甄妮仲喺港台節目《晨光第一線》話Eason「長輩同佢講嘢，佢都唔正眼睇住。」之後Eason於港台再碰見甄妮，合照後臨走都大大聲話：「我走啦前輩！」孺子可教！
抦張栢芝超嘈
有次甄妮搭飛機，同機咁啱有陳奕迅、當時仲係情侶嘅張栢芝、陳曉東。由於3人聲浪太大。被甄妮喝收聲。事後仲話：「最記得栢芝嘅鵝公喉。」
